Барсук, які любуецца сваёй выявай у стылі Бэнксі, стаў пераможцам на конкурсе фатаграфій дзікай прыроды
Фатографу спатрэбілася два гады, каб атрымаўся здымак.
Барсук, які любуецца сваёй выявай у стылі Бэнксі, стаў пераможцам конкурсу «Найлепшы фатограф дзікай прыроды года 2024», які арганізуе Музей натуральнай гісторыі ў Брытаніі, піша Бі-бі-сі.
Фотаздымак быў зроблены на ціхай вуліцы ў марскім англійскім горадзе Сент-Леанардс-он-Сі брытанскім фатографам Янам Вудам.
Ян заўважыў, як барсукі выходзяць з бліжэйшай нары, каб паласавацца харчовымі рэшткамі, якія пакідаюць лісы.
«Я правёў большую частку двух гадоў, фатаграфуючы іх, і гэтая канкрэтная фатаграфія першапачаткова ўзнікла як ідэя. Я падумаў, што было б цікава намаляваць графіці і паглядзець, ці атрымаецца мне зняць барсука, які праходзіць пад ім», — распавёў ён.
Ян бачыць у сваім здымку больш глыбокі сэнс, звязаны з супярэчлівай тэмай вакол знішчэння барсукоў.
Адстрэл барсукоў выкарыстоўваецца для барацьбы з бычачымі сухотамі, аднак у Англіі гэтая практыка будзе спынена цягам наступных пяці гадоў у межах змен у сістэме барацьбы з гэтым захворваннем. Пра гэта заявіў урад летась.
Ян назваў знішчэнне барсукоў нацыянальнай ганьбай. «Я б адразу ж аддаў гэтую ўзнагароду, каб урад ануляваў усе існуючыя ліцэнзіі на адстрэл барсукоў», — дадаў ён.
25 здымкаў, намінаваных на прэмію «Народны выбар» у катэгорыі «Фатограф дзікай прыроды года», атрымалі 70 тысяч галасоў ад аматараў фатаграфіі дзікай прыроды з усяго свету.
Колькасць тых, хто галасаваў у гэтым годзе, стала рэкорднай.
«У гатэлі стаіць ахова толькі праз тое, што ты белай расы». Як беларус працаваў у В'етнаме, Зімбабвэ і Філіпінах9
Каментары