Былы міністр культуры Павел Латушка падзяліўся ўспамінамі пра тое, як вырашалася пытанне па перапахаванні парэшткаў класіка.
Вядома, што Максім Багдановіч памёр у Ялце. З ідэяй перапахавання паэта, па словах Латушкі, у яго бытнасць міністрам культуры (2009-2012 гады) звярнуўся «адзін з папярэднікаў на пасадзе міністра, шанаваны ў культурных колах чалавек».
«Мы пачалі абмяркоўваць і сышліся на меркаванні, што перапахаванне Максіма Багдановіча магло б быць аднаўленнем гістарычнай справядлівасці, моцнай і нацыянальна ўздымнай падзеяй для беларускага грамадства, для разумення нашай культурнай самабытнасці, важнасці спадчыны», — адзначае Латушка.
Па яго словах, было шмат аргументаў як «за», так і «супраць».
«Гэта быў шанец для беларускай культуры — пахаваць Багдановіча на радзіме, пра якую ён столькі пісаў».
Латушка згадвае, што накіраваў ліст да пасла Беларусі ва Украіне Валянціна Вялічкі з просьбай, каб той паспрабаваў правесці перамовы з уладамі Украіны, з міністэрствам культуры гэтай краіны на прадмет перапахавання Багдановіча ў Мінску.
«Памятаю, што гэтую тэму я падымаў таксама пад час перамоваў з украінскімі міністрамі. Гэта быў складаны працэс, які, на жаль, тады рэалізаваць не ўдалося», — дзеліцца Латушка.
Па яго словах, адна з заўваг была звязаная з тым, што, па словах даследчыкаў, пліта над магілай Максіма Багдановіча была перасунута ў выніку землятрусу. Таму на сто адсоткаў сказаць, што пад плітою пахаваны Максім Багдановіч, было немагчыма.
«Зразумела, што трэба было рабіць экспертызу, аналіз ДНК. І гэта ўжо была іншая гісторыя. На жаль, усё ж такі гэта не атрымалася. Але гэта не значыць, што гэта немагчыма зрабіць у будучым — пачынаючы з ДНК і заканчваючы магчымасцю перапахавання», — лічыць палітык.
Чытайце яшчэ:
«Не вядзіцеся на павеўную моду — падглядаць за класікамі ў замочную адтуліну»
У архіве знайшлі дакументы, датычныя вучобы Максіма Багдановіча
У які дзень у 2020-м маглі здарыцца перамены? Польскі дыпламат выдаў кнігу аб працы ў Беларусі і даў адказ на гэта пытанне12
Каментары