Як попыт у ЗША на прэпарат для пахудзення прывёў да росту эканомікі Даніі
Фармацэўтычны сектар Даніі прывёў да значнага росту валютных паступленняў у краіну. У выніку адзначаецца прафіцыт бюджэту краіны на рэкордным узроўні. Але гэта мае і негатыўныя наступствы для эканомікі.
Як піша Le Monde, фармацэўтычная прамысловасць, экспарт якой развіўся за дзесяць гадоў, стала адным з галоўных рухавікоў эканомікі Даніі. Сам сектар у параўнанні з 2020 годам вырас на траціну.
Поспехі звязаныя з добрымі вынікамі дацкай фармакалагічнай кампаніі Novo Nordisk. Продаж прэпарату для пахудзення Wegovy, які яна выпускае, павялічыўся на 344% у першым паўгоддзі, імклівы рост продажу паказвае супрацьдыябетычны прэпарат Ozempic.
Па даных Еўрастата, рынкавая капіталізацыя Novo Nordisk, якая перавышае 300 мільярдаў еўра, амаль роўная валавому ўнутранаму прадукту Даніі.
Такія вынікі працы фармакалагічнай галіны прывялі да росту эканомікі краіны. Данія паказвае стабільны рост ВУП, які перавышае сярэдні ўзровень па EC. Напрыклад, у першым квартале 2023 года ён склаў 0,6% супраць 0,2% па ЕС. Акрамя таго, у краіне назіраецца прафіцыт бюджэту ў памеры 3,3% ВУП, у той час як у ЕС зафіксаваны дэфіцыт у 3,4%.
У той жа час рост попыту ў ЗША на прэпараты для пахудзення і ад дыябету, якія вырабляюцца ў Даніі, разгойдвае дацкую грашова-крэдытную палітыку. Гэты дзіўны «эфект матылька» ў макраэканамічных вымярэннях эканомікі — вельмі канкрэтная дылема, з якой у апошнія месяцы сутыкнуўся Нацыянальны банк Даніі.
Поспех фармакалагічнага сектара прывёў да каласальнага прытоку валюты ў краіну, што, у сваю чаргу, выклікала рост кошту дацкай кроны. Нацыянальнаму банку даводзіцца шукаць спосабы, каб утрымаць курс дацкай кроны адносна еўра.
Для гэтага ў апошнія месяцы ён выступае актыўным пакупніком валюты, а таксама трымае сваю працэнтную стаўку ніжэйшай, чым у Еўрапейскага цэнтральнага банка (3,35% супраць 3,75%), каб трохі прыпыніць інвестыцыі ў краіну і знізіць попыт на крону.
Эксперты таксама адзначаюць, што поспех фармацэўтычнай прамысловасці не павінен маскіраваць цяжкасці ў іншых сектарах эканомікі, справы ў якіх ідуць горш, чым у іншых краінах Еўропы.
Іншыя занепакоеныя тым, каб краіна не стала залежнай ад адной кампаніі, як гэта адбылося ў пачатку 2000-х у Фінляндыі, у эканоміцы якой дамінавала Nokia, і краіне спатрэбіліся гады на аднаўленне пасля яе падзення.
Чытайце яшчэ:
Данія хоча знізіць узрост для абортаў без згоды бацькоў да 15 гадоў
Фізічныя практыкаванні ў маладосці могуць знізіць рызыку раку на 40% — навукоўцы
Белыя ды чырвоныя кветкі і мора слёз. Як у Вільні сустракалі Паліну Шарэнду-Панасюк29
Каментары