Алексін і былы беларускі дэпутат трымалі мільёны еўра ў швейцарскім банку
Беларускі расследавальніцкі цэнтр вывучыў даныя ўцечкі аб кліентах буйнога швейцарскага банка Credit Suisse. Сярод іх аказалася некалькі цікавых прозвішчаў. Расследавальнікі лічаць, што гэтыя людзі маглі скарыстацца сакрэтнасцю швейцарскай банкаўскай сістэмы для сумнеўных мэтаў.
У студзені 2012 у швейцарскім банку Credit Suisse з'явіўся рахунак на неназваную кампанію беларускага бізнэсмена ўдачы Аляксея Алексіна. У ліпені на ім налічвалася больш за $36 млн.
Здарылася гэта ў разгар схемы з растваральнікамі і разбаўляльнікамі, ідэю якой прыпісваюць Алексіну. У 2012 годзе Расія спыніла схемы з растваральнікамі, а праз два гады Алексін закрыў рахунак у Credit Suisse.
Алексін адмовіў расследавальнікам у каментарыі.
Былы дэпутат Палаты прадстаўнікоў і колішні гендырэктар «Беларуськалія» (займаў гэтае крэсла з 1992 па 2001 год) Пётр Калугін у 2008-м адкрыў рахунак у швейцарскім банку Credit Suisse для неназванай фірмы.
На той момант ён афіцыйна не працаваў ні ў адной кампаніі ў Беларусі — быў толькі дэпутатам Палаты прадстаўнікоў. Праз год і сем месяцаў на гэтым рахунку з'явіцца амаль $1,3 млн.
З дапамогай Кіберпартызан расследавальнікі высветлілі, што даход Калугіна за сем гадоў — з 2003 па 2009 гады — склаў каля $87 тысяч. Гэта ў 15 разоў менш, чым сума на яго швейцарскім рахунку.
У 2009 годзе Калугін пачаў працаваць у «Шахтаспецбудзе» — былым падраздзяленні «Беларуськалія», якое стала прыватным прадпрыемствам. Прычым прызначэнне Калугіна адбылося напярэдадні вялікага праекта.
У студзені 2010 года Беларусь дамовілася аб будаўніцтве ў Туркменістане Гарлыцкага горна-абагачальнага камбіната коштам блізу $1 млрд. Генеральны падрадчык праекта, кампанія «Белгархімпрам», узяў на субпадрад «Шахтаспецбуд». Праз два месяцы на швейцарскім рахунку Калугіна з'явіліся тыя самыя $1,3 млн.
Па тлумачэнні звярнуліся наўпрост да Пятра Калугіна, але ў тэлефоннай размове выразна пракаментаваць пытанні ён не змог.
Будаўніцтва комплексу абярнулася скандалам. Паводле звестак СМІ, туркменскія ўлады абвінавацілі Беларусь у неналежным выкананні кантракту і падалі іск у арбітражны інстытут гандлёвай палаты Стакгольма, шырока вядомы як Стакгольмскі арбітраж. Шкоду яны ацанілі ў $900 млн. У Беларусі гэтыя абвінавачванні адкінулі і падалі сустрэчны іск на $400 млн. Аб завяршэнні разбору дагэтуль не паведамлялася, але калійны камбінат у Туркменістане ўсё ж такі здалі ў эксплуатацыю. Адбылося гэта ў 2017 годзе, хоць запуск планаваўся двума гадамі раней.
Увесь гэты час Пётр Калугін працуе ў «Шахтаспецбудзе». На яго запісаны невялікі дом у Слуцкім раёне, на яго жонку — чатырохпакаёвая кватэра каля Камсамольскага возера ў Мінску і двухпавярховы катэдж ля Салігорскага вадасховішча.
Свой рахунак у швейцарскім банку Калугін закрыў у жніўні 2014 года.
Падрабязней з расследаваннем можна азнаёміцца па спасылцы.
Белыя ды чырвоныя кветкі і мора слёз. Як у Вільні сустракалі Паліну Шарэнду-Панасюк29
Каментары