Alaksandr Łukašenka i staršynia savieta dyrektaraŭ AAT «NK «Ruśśniefť» Michaił Huceryjeŭ zakłali kapsułu na miescy budaŭnictva Niežynskaha horna-abahačalnaha kompleksu, pieradaje BiełTA.
Kapsuła zakładziena ŭ pamiatny kamień pry pačatku budaŭnictva Niežynskaha horna-abahačalnaha kompleksu na bazie Starobinskaha radovišča kalijnych solaŭ.
«My nadajom asablivaje značeńnie dynamičnamu raźvićciu kalijnaj haliny i imkniemsia ŭtrymlivać lidarskija pazicyi ŭ śviecie pa vytvorčaści uhnajeńniaŭ, — havorycca ŭ zapisie, jaki źmiaščajecca ŭ kapsule. — Budaŭnictva novaha kompleksu źjaŭlajecca čarhovym krokam u aktyŭnym zasvajeńni pryrodnych bahaćciaŭ rodnaj ziamli, stvareńni novych pracoŭnych miescaŭ i pavieličeńni ekspartnaha patencyjału krainy. Heta važny inviestycyjny prajekt, realizacyja jakoha pasłužyć na karyść biełaruskaha naroda». Pažadańnie budučym pakaleńniam — hodna pradoŭžyć pačatuju spravu, upeŭniena iści napierad i ŭmacoŭvać Ajčynu stvaralnymi spravami.
Realizacyja prajekta pa budaŭnictvu Niežynskaha horna-abahačalnaha kompleksu maje jak rehijanalnaje, tak i ahulnadziaržaŭnaje značeńnie, zajaviŭ Łukašenka na cyrymonii pačatku budaŭnictva Niežynskaha horna-abahačalnaha kompleksu ZTAA «Słavkalij».
Łukašenka daručyŭ całkam pierahledzieć hienieralny płan raźvićcia Lubanskaha rajona z tym, kab da kanca budaŭnictva ŭ Lubanskim rajonie Niežynskaha horna-abahačalnaha kompleksu heta byŭ samy sučasny rehijon krainy.
Na pradpryjemstvie buduć stvorany amal 2000 pracoŭnych miescaŭ i sacyjalnaja infrastruktura dla kamfortnaha žyćcia. Akramia taho, u pracesie budaŭnictva kompleksu praduhledžana mahčymaść hazifikacyi 21 nasielenaha punkta Lubanskaha rajona, i heta płanujecca zrabić na praciahu bližejšych dvuch-troch hadoŭ.
Budzie pabudavana čyhunačnaja stancyja i 37 km čyhunki, rekanstrujavany Lubanski vodazabor i ačyščalnyja zbudavańni.
Alaksandr Łukašenka pažadaŭ usim udzielnikam budaŭnictva realizavać hety prajekt ŭ termin i pry hetym zrabić usio jakasna.
Prajekt Huceryjeva ŭ Lubanskim rajonie daść pieršuju pradukcyju praź piać hadoŭ
U jaki dzień u 2020-m mahli zdarycca pieramieny? Polski dypłamat vydaŭ knihu ab pracy ŭ Biełarusi i daŭ adkaz na heta pytańnie12
Kamientary