Hiermanija padazraje Rasiju ŭ šerahu dyviersij z aŭto pa ŭsioj krainie
Niekalki miescaŭ tamu ŭ roznych haradach Hiermanii vychłapnyja truby sotniaŭ aŭto byli zalityja mantažnaj pienaj. Dziejańniami, jakija nahadvali rabotu radykalnych klimatyčnych aktyvistaŭ, kiravali kuratary z Rasii.
![cars germany aŭto Hiermanija Avto Hiermanija](http://d3ge8ctsmrv6s9.cloudfront.net/img/w840d4webp1/photos/z_2025_02/carsgermany-ozzs7.jpg.webp)
Niamieckaje vydańnie Der Spiegel piša pra rasśledavańnie vypadkaŭ masavaha paškodžańnia aŭtamabilaŭ, jakija adbylisia ŭ roznych haradach Hiermanii ŭ kancy minułaha hoda.
Tolki za adnu noč 11 śniežnia 2024 hoda ŭ Šoniefieldzie (fiederalnaja ziamla Brandenburh) z dapamohaj mantažnaj pieny, jakoj zalili vychłapnyja truby, było paškodžana 43 aŭtamabili. Na łabavym i zadnim škle kožnaha aŭto była naklejka z łozunham «Budź zielaniejšym» (Sei grüner!) pobač z fota ministra ekanomiki krainy Robierta Chabieka, jaki pradstaŭlaje partyju «Sajuz 90/Zialonyja».
«Klimatyčnyja radykały atakujuć aŭtamabili budaŭničaj pienaj», — napisała tady vydańnie Bild, a ŭ Facebook rasła chvala hramadskaha abureńnia «zialonymi» i Chabiekam. Adnak, jak piša Der Spiegel, miarkujučy pa ŭsim, ŚMI i hramadskaść naŭmysna byli nakiravany pa iłžyvym śledzie. Pa infarmacyi vydańnia, śled sabatažnikaŭ viadzie nie da klimatyčnych aktyvistaŭ, a ŭ Maskvu.
Pa źviestkach orhanaŭ biaśpieki, za sieryjaj dyviersijnych napadaŭ stajali rasijskija zakazčyki. Pa ŭsioj Hiermanii — u stalicy, a taksama fiederalnych ziemlach Brandenburh, Bavaryja i Baden-Viurtembierh byli paškodžany bolš za 270 transpartnych srodkaŭ.
Abureńnie z nahody nibyta złačynnych dziejańniaŭ pradstaŭnikoŭ «zialonych», jak vyhladaje, było zapłanavanym. Pavodle krynic u strukturach biaśpieki, heta častka metanakiravanaj kampanii, skiravanaj na raspalvańnie nianaviści da partyi «Sajuz 90/Zialonyja» i jaje kandydata ŭ kanclery Robierta Chabieka padčas pieradvybarčaj baraćby ŭ bundestah, a taksama na pahłybleńnie raskołu ŭ hramadstvie.
Deutschlandweite Sabotageserie offenbar von Russland gesteuert:
Auspuffrohre Hunderter Autos verklebten sie mit Bauschaum, Scheiben mit Habeck-Stickern: Was wie das Werk von Klimaaktivisten aussah, soll auf das Konto Moskaus gehen. @derspiegel https://t.co/qnBDUceLJw
«Adnarazovyja ahienty»
Pa infarmacyi Der Spiegel, u dyviersijach, ździejśnienych u Šoniefieldzie, padazrajucca troje maładych ludziej, jakija byli śpiecyjalna zavierbavanyja i pavinny byli pa ŭsioj krainie paškodzić aŭtamabili — pažadana niamieckaj vytvorčaści — z dapamohaj mantažnaj pieny i pakinuć na miescach złačynstvaŭ naklejki partyi zialonych. Uzamien jany, jak paviedamlajecca, atrymali niekalki tysiač jeŭra.
Jak adznačaje vydańnie, zamiest taho kab vykarystoŭvać prafiesijna padrychtavanych špijonaŭ, rasijskija śpiecsłužby ŭsio čaściej pryciahvajuć da svaich apieracyj amataraŭ — pieravažna maładych ludziej z kryminalnaha asiarodździa. Za hrošy jany pavinny vykonvać sakretnyja zadańni ŭ Jeŭropie — ad naniasieńnia prapahandysckich hrafici da sabatažu. Ekśpierty pa biaśpiecy nazyvajuć hetuju źjavu «ahientami nizkaha ŭzroŭniu» (low level agents).
Dla Maskvy vykarystańnie najomnych vykanaŭcaŭ maje peŭnyja pieravahi: kali ich vykryjuć, straty buduć značna mienšymi, čym u vypadku aryštu prafiesijnych ahientaŭ. Tamu śpiecyjalisty nazyvajuć ich taksama «adnarazovymi ahientami».
Pavodle danych śpiecsłužbaŭ, čaściej za ŭsio na takija zadańni nabirajuć maładych ruskamoŭnych mužčyn, jakija prychilna staviacca da palityki Maskvy. Jak adznačajecca ŭ paviedamleńni niamieckaha Fiederalnaha viedamstva pa achovie Kanstytucyi, viarboŭka takich ludziej adbyvajecca praz sacyjalnyja sietki i miesiendžary.
100 jeŭra za aŭto
Zatrymać vinavatych u masavym naniasieńni škody aŭtamabilam u Šoniefieldzie dapamoh vypadak. U noč ździajśnieńnia złačynstva palicyja spyniła padazrony furhon Opel z rehistracyjnymi znakami horada Ulm (ziamla Baden-Viurtembierh). U im znachodziłasia troje maładych ludziej 20, 17 i 18 hadoŭ. Jany mieli paśviedčańni asoby, vydadzienyja Hiermanijaj, Sierbijaj, Bośnijaj i Hiercahavinaj.
Palicyja nie znajšła pry ich instrumientaŭ dla ŭzłomu, tolki materyjały dla budaŭničych rabot, u tym liku niekalki bałončykaŭ z mantažnaj pienaj, jakaja vykarystoŭvajecca dla ŭščylnieńnia akonnych ram. Paśla pravierki asabistych źviestak usim traim dazvolili jechać dalej.
Zdavałasia b, iłžyvaja tryvoha. Ale kali rankam stali pastupać zajavy ŭładalnikaŭ aŭto, palicyja prainfarmavała svaich kaleh u Baden-Viurtenbierhu i pieradała asabistyja źviestki maładych ludziej. 13 śniežnia va ŭsich traich byli praviedzieny pieratrusy, kanfiskavanyja mabilnyja telefony, noŭtbuki i pryłady zachoŭvańnia danych, a taksama niekalki bałončykaŭ z budaŭničaj pienaj.
Pavodle źviestak vydańnia, adzin z troch padazravanych užo daŭ pakazańni śledčym. Pa słovach maładoha čałavieka, ź imi praź miesiendžar Viber źviazaŭsia rasijanin, jaki daŭ padrabiaznyja instrukcyi pa arhanizacyi dyviersij.
Dla paćviardžeńnia vykanańnia zadańnia im treba było dasyłać fotazdymki paškodžanych aŭtamabilaŭ, a za kožnaje aŭto było paabiacana ŭznaharodžańnie ŭ 100 jeŭra. Častka hrošaj, niekalki tysiač jeŭra, užo była pieradadziena padazravanym najaŭnymi, u kanviercie. Akramia taho, zakazčyk zapeŭniŭ ich, što ŭ vypadku zatrymańnia i pakarańnia jon pakryje ŭsie vydatki.
Pavodle zajavy prakuratury Ulma, jakaja zajmajecca častkaj vypadkaŭ, śledstva viadziecca ŭ dačynieńni da čatyroch padazravanych pa spravie sumiesnaha paškodžańnia majomaści.
Tolki ŭ rajonie Ulma było paškodžana 123 aŭtamabili, a ahulnaja suma škody aceńvajecca prykładna ŭ 6000 jeŭra. Nijakaj dadatkovaj infarmacyi adnosna matyvaŭ złačynstva nie paviedamlajecca. Rasśledavańnie praciahvajecca.
Pakul aryštaŭ nie było. Pa infarmacyi Der Spiegel, dvoje abvinavačanych tym časam pakinuli Hiermaniju.
Kamientary