Domračava i Skardzina dałučylisia da čelendžu, kab sabrać hrošy na reabilitacyju dački Arzamasavaj
Alimpijskija čempijonki pa bijatłonie Darja Domračava i Nadzieja Skardzina dałučylisia da dabračynnaha čelendžu, kab dapamahčy sabrać hrošy ciažka chvoraj dačce biahuchi Maryny Arzamasavaj. Tata dziaŭčynki abiacaje kožny dzień biehać marafon i zaprašaje ŭsich dałučycca.
Darja Domračava zapościła ŭ svaim instahramie fota ź bijatłanistkami Nadziejaj Skardzina i Anastasijaj Kinunien, padpisaŭšy: «Sustrelisia nie tolki z zadavalnieńniem, ale i na karyść!». Jana dadała chešteh #biežimVpomoŝSašie.
Biada ŭ siamji spartsmienaŭ Maryny i Illi Arzamasavych zdaryłasia ŭ kancy studzienia. Ich 14-hadovaja dačka Saša, jakaja nikoli nie mieła asablivych prablem sa zdaroŭjem, raptoŭna adčuła siabie drenna. Usiaho praź piać dzion u dziaŭčynki pierastali słuchacca ruki i nohi. Dyjahnaz ahłušyŭ baćkoŭ: sindrom Hijena-Bare. Heta ciažkaje aŭtaimunnaje zachvorvańnie, jakoje prahresiruje z kaśmičnaj chutkaściu, pry im paražajucca ŭčastki pieryfieryčynaj niervovaj sistemy.
Vierahodna, pryčyna zachvorvańnia ŭ kišačnaj infiekcyi, na jakuju Saša pierachvareła da hetaha. Nichto nie moh padumać, što zvyčajnaja infiekcyja pryviadzie da takich žachlivych nastupstvaŭ, tamu paśla pieršych simptomaŭ davać antybijotyki nie stali.
Maryna Arzamasava tady paviedamiła ŭ sacyjalnych sietkach, što prypyniaje pracu trenierkaj, kab usie siły nakiravać na dapamohu svajmu dziciaci.
Praź miesiac u balnicy spartoŭka napisała, što dačka vyjšła na płato — stan stabilny, vostry pieryjad spaŭ, ale kardynalna situacyja nie mianiajecca.
— Nijakich prahnozaŭ i terminaŭ niama, — napisała lohkaatletka, — akramia taho, što ŭsio budzie doŭha i niaprosta. Heta nie takaja chvaroba, što dzicia ŭ balnicy, a ty nosiš jamu pieradačy i čakaješ doma. A kali jon papravicca, to ŭstanie i pojdzie žyć svaim zvyčajnym žyćciom.
Maryna ščyra pryznałasia, što joj było vielmi składana ŭśviadomić novuju realnaść. A kali ŭsio ž taki pryjšło razumieńnie, što jak raniej užo nie budzie, to jaje vielmi mocna nakryła.
Dziaŭčynka nie mahła navat pavarušyć rukoj — nie kažučy ŭžo pra toje, kab prosta sieści na łožku. Saša vielmi mocna schudnieła i zamiest 47 kiłahramaŭ stała važyć 32.
Biełaruskim daktaram udałosia spynić zachvorvańnie. Marynu z dačkoj adpravili ŭ reabilitacyjny centr u Aksakaŭščynie. Biahucha raspaviała, što mieła vialikija nadziei i čakańni, ale pieršyja paru dzion centr Marynie nie padabaŭsia. Pa słovach spartoŭki, havorki ab paŭnavartasnaj reabilitacyi nie išło — usio abmiažoŭvałasia 30 chvilinami ŁFK u dzień.
Maryna, jakaja da taho momantu aktyŭna vyvučała dośvied reabilitacyi takich pacyjentaŭ u inšych krainach, była ŭ šoku, što ź imi nie pravodziać praktykavańniaŭ, jakija rekamiendavany za miažoj.
Prahresu ŭ Sašy nie było. Tamu baćki vyrašyli, što nielha hublać čas — bo ad hetaha zaležyć, ci zmoža ich dačka znoŭ chadzić i žyć bolš-mienš zvyčajnym žyćciom. Maryna z Sašaj pajechała na reabilitacyju ŭ centr «Try siastry», jaki znachodzicca ŭ Rasii.
Pieršy miesiac reabilitacyi prynios šmat pośpiechaŭ. Dziaŭčynka znoŭ navučyłasia siadzieć u kreśle i biez apory, pieravaročvacca sa śpiny na bok, pačała varušyć rukami. Maryna piša ŭ instahramie, što maryć, kab Saša, jak i jaje ravieśniki, znoŭ zmahła b siadzieć u telefonie.
Daktary śćviardžajuć, što dziaŭčyncy treba jašče 6-8 miesiacaŭ takich aktyŭnych zaniatkaŭ (a chutčej za ŭsio nie mienš za hod). Kožny miesiac u centry kaštuje prykładna 10,5 tysiačy dalaraŭ.
Siamja prosić dapamahčy sabrać nieabchodnuju sumu. Tata Sašy Illa Arzamasaŭ paviedamiŭ, što płanuje kožny dzień prabiahać kłasičny marafon — 42 kiłamietry 195 mietraŭ. Illa zaprašaje achvotnych dałučacca da jaho prabiežak (pra miescy zboru jon paviedamlaje ŭ svaim instahramie). Udzieł u zabiehu — pieravod na dabračynny rachunak luboj pasilnaj dla čałavieka sumy.
Baćki prosiać i ab infarmacyjnaj padtrymcy. Jany prapanoŭvajuć nieabyjakavym ludziam raźmiaščać u svaich sacyjalnych sietkach chešteh #BiežimVpomoŝSašie, kab jak maha bolš ludziej daviedalisia pra dabračynny zbor.
U jaki dzień u 2020-m mahli zdarycca pieramieny? Polski dypłamat vydaŭ knihu ab pracy ŭ Biełarusi i daŭ adkaz na heta pytańnie2
Kamientary
heta chiba nie dyskredytacyja ajčynnaj achovy zdaroŭja? aryštavać-pasadzić? nie? tamu što nie bčb?