Ukrainskija filmy, jakija pakažuć na kinafiestyvali «Paŭnočnaje źziańnie»
Siońnia pačynajecca kinafiestyval «Paŭnočnaje źziańnie». Druhi hod zapar na im možna budzie pahladzieć sučasnaje ŭkrainskaje kino ŭ miežach śpiecyjalnaj prahramy UKRAINE MON AMOUR. U prahramu ŭvajšli try filmy ŭkrainskich aŭtaraŭ.
Kadr ź filma «My nie zhaśniem»
«My nie zhaśniem»
2023, Ukraina, Francyja, Polšča, ZŠA
18/11/23
«My nie zhaśniem» — dakumientalny film pra piaciarych ukrainskich padletkaŭ z Danbasa, jakija, jak i ŭsie tynejdžary, słuchajuć muzyku, malujuć, hulajuć i marać pra svabodu i daśledavańnie vialikaha śvietu, adnak usio heta adbyvajecca nasupierak strašnaj rečaisnaści navokał. Adnojčy jany atrymlivajuć unikalnuju mahčymaść pakaryć Himałai.
Režysiorka Alisa Kavalenka zdymała hety film z 2019 da 2022 hoda ŭ Łuhanskaj vobłaści. Historyja składajecca vielmi mazaična, pastupova raskazvajučy pra los kožnaha ź piaci hierojaŭ, režysiorka adpraŭlaje hledača ŭ vielmi emacyjnaje padarožža. Jakoje nie tolki dziakujučy samoj historyi, ale i mantažu, cudoŭnaj apieratarskaj pracy i vydatnamu muzyčnamu afarmleńniu nie maje šancaŭ pakinuć hledača abyjakavym. Suśvietnaja premjera filma «My nie zhaśniem» adbyłasia na Bierlinale, paśla čaho dakumientalnaja stužka stała tryumfataram šmatlikich mižnarodnych kinafiestyvalaŭ.
Prymierkavana da pakazu filma «My nie zhaśniem» 18 listapada a 14:00 (pa minskim časie) online u žyvym efiry adbudziecca ivent «U vajny nie dziciačy tvar». Heta razmova z Alisaj Kavalenka pra toje, što žančyna-režysiorka adčuvaje na vajnie i jak vyhladaje dziacinstva na linii frontu. Maderavać razmovu budzie dyrektarka kinafiestyvalu «Paŭnočnaje źziańnie» Vola Čajkoŭskaja.
«Bačańnie matylka»
2022, Ukraina, Čechija, Charvatyja, Šviecyja
22/11/23
«Bačańnie matylka» — film pra vajennapałonnuju, jakaja nosić dzicia ad svajho katavalnika. Paśla miesiacaŭ za kratami na Danbasie ekśpiertka ŭ pavietranaj vyviedcy — ukrainka Lilija — viartajecca damoŭ da siamji. Adnak traŭma pałonu nie pakidaje hierainiu i praryvajecca, jak u śnie. Niešta, što raście ŭ Lilii, nie daje joj zabyć, adnak žančyna admaŭlajecca identyfikavać siabie jak achviaru i hatova zmahacca za svaju volu.
Stužka «Bačańnie matylka» była źniata da poŭnamaštabnaha ŭvarvańnia Rasii va Ukrainu. Pieršapačatkova režysior Maksim Nakaniečny chacieŭ pryciahnuć uvahu suśvietnaj hramadskaści da vajny va Ukrainie, jakaja pačałasia ŭ 2014 hodzie. U vyniku, «Bačańnie matylka» stała poŭnamietražnym debiutam režysiora, a taksama žorstkaj, ale svoječasovaj spoviedździu abaroncaŭ Ukrainy i ŭsich žančyn, što zmahajucca za svaju cełasnaść, volu i budučyniu.
Suśvietnaja premjera filma adbyłasia ŭ ramkach prahramy «Asablivy pohlad» Kanskaha kinafiestyvalu.
«Ja, Nina»
2022, Ukraina, Hiermanija
23/11/23
Heta drama ŭ styli realizmu, zasnavanaja na sapraŭdnych padziejach: rezkich žyćciovych źmienach paśpiachovaj telezorki Niny praz rak. Historyja viadzie hierainiu ad załatych viaršyń jaje pryhožaha žyćcia da jaho najciamniejšych častak. Pierad Ninaj adkryvajecca ceły novy śviet, jaki jana nie prymaje, ale musić tryvać i ŭ im zmahacca za svajo žyćcio.
Aproč realnaj historyi ŭkrainskaj televiadučaj, jakaja vystupiła pradziusarkaj filma, režysiorka Marysia Nikiciuk pry napisańni scenara abapirałasia na danyja z 30 intervju, jakija jana praviała ź lekarami i pacyjentami.
U aktrysy Ksienii Chižniak, dla jakoj heta pieršaja praca ŭ kino, atrymałasia praŭdziva syhrać žančynu, jakaja padviarhajecca stałamu stresu, i jana ŭdała pakazała ŭnutranaje dužańnie hieraini samoj z saboj. Dziakujučy čamu ŭ hledača jość mahčymaść adčuć usiu hłybiniu trahiedyi hetaj historyi i adčuć transfarmacyju hałoŭnaj hieraini.
Filmy prahramy UKRAINE MON AMOUR buduć dastupnyja dla prahladu online biaspłatna z 00:00 da 23:59 (pa Minskim časie) zhodna z raskładam pa papiaredniaj rehistracyi (kali hladač raniej nie rehistravaŭsia na płatformie kinafiestyvalu ci anłajn-kinateatra VODBLISK).
Kamientary