Biełaruskija aŭtobusy ŭ Pieciarburhu časta harać, ich vykarystańnie prypynili
U Sankt-Pieciarburhu z 2 žniŭnia prypynili ekspłuatacyju biełaruskich aŭtobusaŭ MAZ z-za taho, što jany rehularna zaharajucca, paviedamlaje Reform.by.
«U suviazi z najaŭnaściu zaŭvah, jakija patencyjna mohuć pryvieści da zaharańnia aŭtobusaŭ, pryniataja pastanova, što HUP «Pasažyraŭtatrans» ź siońniašniaha dnia prypyniaje ekspłuatacyju na haradskoj maršrutnaj sietcy 137 aŭtobusaŭ Minskaha aŭtamabilnaha zavoda (MAZ 203047), jakija pastupili ŭ Pieciarburh u ramkach kantraktaŭ, padpisanych u 2022 hodzie», — paviedamlaje haradskaja administracyja.
Na pradpryjemstvie pracuje kamisija, stvoranaja sumiesna z pradstaŭnikami AAT «MAZ» — kiraŭničaja kampanija chołdynhu «BiełaŭtaMAZ». Vyjaŭleńniem pryčyn zaharańniaŭ taksama zajmajecca rasijskaje MNS.
Źniatyja z ekspłuatacyi aŭtobusy viernucca na maršrut tolki paśla dadatkovaj pravierki i likvidacyi defiektaŭ.
«U ramkach novych damoŭ na zakupku aŭtobusaŭ hetaj marki, zaklučanych pradpryjemstvam u 2023 hodzie, mašyny nie buduć pryniatyja na bałans «Pasažyraŭtatrans» taksama da likvidacyi zaŭvah», — paviedamlaje administracyja Pieciarburha.
14 lipienia vice-hubiernatar horada pravioŭ naradu z pradstaŭnikami zavodaŭ-vytvorcaŭ pasažyrskich aŭtobusaŭ, u tym liku z kiraŭnictvam MAZa. Na naradzie było vyrašana, što ŭ kanstrukcyi aŭtobusaŭ uniasuć źmieny i ŭzmocniać kantrol za vytvorčaściu. Ciapier MAZ vykonvaje zakaz Sankt-Pieciarburha na pastaŭku 900 aŭtobusaŭ.
Niekalki aŭtobusaŭ zhareli ŭ horadzie sioleta. Hetaja prablema navat abmiarkoŭvałasia na sustrečy Alaksandra Łukašenki z hubiernataram horada Alaksandram Biahłovym.
Aleksin i Tapuzidzis skončyli vajnu za tytuniovy rynak Biełarusi. Abodva prajhrali. A voś chto, zdajecca, pieramoh9
Kamientary