Naradziŭsia va Ukrainie, byŭ drobnym čynoŭnikam, vajavaŭ u Afrycy. Raskrytaja asoba «Pijaniera», jaki ŭznačaliŭ «Vahnier» u Biełarusi

Pa źviestkach rasśledavalnikaŭ resursu All eyes on Wagner, «Pijanier» — heta 46-hadovy Siarhiej Čubko. Jany vyznačyli heta z dapamohaj dakumientaŭ pra čalcoŭ «Vahniera», jakija im pieradała nienazvanaja krynica.

Ź siamji savieckaha vajskoŭca

Mužčyna naradziŭsia ŭ 1976 hodzie ŭ horadzie Čarnaŭcy, jaki znachodzicca na paŭdniovym zachadzie Ukrainy, la miežaŭ z Rumynijaj i Małdovaj. Jahony baćka Uładzimir — były vajskoviec. U Čarnaŭcach znachodziŭsia 110-y akružny navučalny centr, radyjołakacyjnaja baza i vajskovy aeradrom. A nie paźniej za 1984-y jany ź siamjoj žyli ŭ horadzie Iziasłavie, dzie była baza vojskaŭ śpiecpryznačeńnia. Taksama Uładzimir Čubko vajavaŭ u Afhanistanie i, mahčyma, u inšych miescach (infarmacyja ŭ hetym abzacy była ŭdakładniena paśla publikacyi).

Pavialičyć

Paśla razvału SSSR siamja Čubko pierajechała ŭ Rasiju, u horad Novarasijsk, jaki znachodzicca na ŭźbiarežžy Čornaha mora. U 1994-m Siarhiej Čubko pajšoŭ słužyć pa kantrakcie ŭ armiju Rasii. Vajavaŭ u Čačni.

Pryvatnyja achoŭnyja pradpryjemstvy

Siarhiej Čubko razarvaŭ kantrakt u 2002-m i pierajšoŭ u pryvatnuju achoŭnuju kampaniju ŭ Navarasijsku.

Baćka mužčyny taksama pracavaŭ u achoŭnych kampanijach i zajmaŭsia biznesam u śfiery pryvatnych achoŭnych pradpryjemstvaŭ (časta jany pracavali razam). A z 2014 pa 2021 hady Čubko-starejšy byŭ dyrektaram adnaho ź ich. 

Pavialičyć

Taksama Čubko-starejšy prachodziŭ treninhi ŭ Mižnarodnaj kontrterarystyčnaj treninhavaj asacyjacyi, jakaja vučyć achoŭnaj dziejnaści. U jaho była licenzija na ažyćciaŭleńnie pryvatnaj detektyŭnaj dziejnaści. Da kryminalnaj adkaznaści baćka i syn Čubko nie pryciahvalisia.

Šlach u čynoŭniki i sproba pazbavić hramadzianstva

U 2003-m u Novarasijsku pamianiali mera, i novy pačaŭ pryznačać na klučavyja pasty byłych siłavikoŭ. Siarhiej Čubko, jaki nie mieŭ vyšejšaj adukacyi, niečakana ŭznačaliŭ kamitet pa spravach moładzi ŭ administracyi horada. A ŭ 2005-m jon pierajšoŭ na pasadu namieśnika kiraŭnika administracyi ŭ Myschakskaj sielskaj akruzie, jakaja padparadkoŭvajecca administracyi Novarasijska.

U 2010-ym hodzie Siarhiej Čubko pracavaŭ achoŭnikam u niekalkich firmach, a taksama byŭ supracoŭnikam pryvatnaha achoŭnaha pradpryjemstva «Rusič». U kantaktach numar, asacyjavany z Čubko, padpisany ŭ ludziej jak «PAP Rusič namieśnik dyrektara» (tam ža pracavaŭ tady jahony baćka). Admietna, što ŭ 2011-m Čubko-małodšaha chacieli pazbavić rasijskaha hramadzianstva za toje, što jon byccam by tajemna maje hramadzianstva Ukrainy.

«Ruski śviet»

Nieviadoma, ci vajavaŭ Siarhiej Čubko va Ukrainie ŭ 2014-m, ale ŭ śniežni 2014-ha jon staŭ adnym z zasnavalnikaŭ «kazackaj» arhanizacyi ŭ Novarasijsku. Rasijskija kazaki jak dobraachvotniki masava pajechali vajavać na baku Rasii paśla abjaŭleńnia niezaležnaści maryjanietačnych «DNR» i «ŁNR».

Pavialičyć

Mužčyna praciahvaŭ pracavać u achoŭnaj kampanii, jakaja nazyvałasia «Čarnamorskaja achoŭnaja firma», a jahony baćka akurat u toj čas uznačaliŭ achoŭnuju kampaniju «Abiaroh Čarnamorja». U kancy vieraśnia 2014-ha Siarhiej Čubko vyjechaŭ u Maskvu i viarnuŭsia adtul tolki 16-ha kastryčnika.

PVK «Vahnier»

Da PVK «Vahnier» jon dałučyŭsia 26 studzienia 2017-ha hoda (pavodle infarmacyi vydańnia All Eyes On Wagner). Paśla hetaha jon jedzie ŭ Siryju — heta ŭskosna paćviardžajuć zapisy jahonych numaroŭ u telefonnych knihach («Siarhiej. Siryja»). Tut jon taksama robić karjeru: praz hod słužby jaho staviać kiraŭnikom vajskovaj apieracyi «Vahniera» va Uschodniaj Hucie.

Pavialičyć

Jahonaja hrupa patrapiła pad abstreł padčas boju pad Chašamam z 7 na 8 lutaha 2018 hoda. Tady hrupa ŭradavych vojskaŭ razam z vahnieraŭcami dy inšymi najmitami sprabavali adbić hazapierapracoŭčy zavod u kurdskich paŭstancaŭ, jakich padtrymlivali ZŠA. U adkaz ZŠA pačali masiravanuju bambardziroŭku hrupy, jana była całkam razhromlenaja. Zahinuła niekalki dziasiatkaŭ vahnieraŭcaŭ (da 80), jašče, pa roznych źviestkach, ad dziasiatkaŭ da sotni byli paranienyja.

U 2019-m Čubko pieravodziać na słužbu ŭ Liviju, dzie adkryvaŭsia čarhovy štab «Vahniera», i jon stanovicca kiraŭnikom PVK u hetym rehijonie. Były vahnieraviec adhukaŭsia pra jaho słužbu tak:

Pavialičyć

«U 2019 hodzie pryjšoŭ zahad chucieńka adpravić siryjcaŭ z našaha atrada «Palaŭničyja na IDIŁ» u Liviju. Kali jany tudy pryjechali, pastupiŭ zvanok ad «Pijaniera»: «Słuchaj, a voś tych, kaho vy dasłali, ich možna jak śmiarotnikaŭ vykarystoŭvać?» Jaki narmalny čałaviek takoje spytaje! Tym bolš pra maich chłopcaŭ».

Paśla Livii Čubko viartajecca ŭ Rasiju na niejki čas. U 2020-m jon pracavaŭ u kampanii «Hłobał Link», jakaja zajmajecca arhanizacyjaj hruzapieravozak i handlem, z zarobkam 80 tysiač rubloŭ (kala 1100 dalaraŭ).

Taksama ŭ mužčyny jość brat, 39-hadovy Dźmitryj Čubko. Pa źviestkach SBU, mužčyna byŭ u składzie misii «Vahniera» ŭ Sudanie ŭ 2019-m, choć, miarkujučy pa publičnych źviestkach, anijakaha asablivaha vajskovaha dośviedu jon nie maje. Jon pracavaŭ šmat dzie, ale anivodnaha razu jahonaja dziejnaść nie była źviazanaja z vajenizavanymi farmiravańniami ci achoŭnymi ahienctvami, prynamsi, na pieršy pohlad. Jon pracavaŭ u firmie, jakaja handluje aŭtamabilami, łahistyčnych kampanijach, koł-centrach bankaŭ. «Pravał» u bazach ź miescami pracy prychodzicca na 2015—2019 hady, tamu jon moh być najmitam «Vahniera» ŭ hety čas.

Viartańnie na vajnu, vajennyja złačynstvy i šlach u Biełaruś

Siarhiej Čubko ŭ vyniku viarnuŭsia ŭ «Vahnier». U pačatku červienia 2021-ha jon užo słužyŭ u Siryi, a 2 lipienia jaho pieravodziać kiraŭnikom apieracyj PVK u CAR. U hetym rehijonie «Vahnier» dziejničaŭ asabliva žorstka.

Pavialičyć

Pa źviestkach arhanizacyi ACLED, bajevikami «Vahniera» było zabita 686 cyvilnych asob (i heta tolki zadakumientavanyja vypadki). Taksama vahnieraŭcy, zhodna sa źviestkami AAN, pieraśledvali miascovaje nasielnictva, žurnalistaŭ i pradstaŭnikoŭ humanitarnych arhanizacyj. Niaredka praktykavalisia advolnyja zatrymańni i katavańni, a taksama teror.

U lipieni Čubko pryjechaŭ u Biełaruś z Rasii razam z astatnimi kałonami PVK, a Pryhožyn pastaviŭ jaho kiraŭnikom bazy ŭ Biełarusi.

• 12
• 0
• 4
• 5
• 7
• 6
• 77
• 0