«Jana tysiačahodździami šukaje vyjścia. Boh maŭčyć». Kupałaŭcy prezientujuć «Kamiedyju Judzifi»
Fiestyval biełaruskaha teatra ŭ Varšavie Inex Fest prezientuje najnoŭšuju premjeru «Kupałaŭcaŭ» i neTTheatre — «Kamiedyja Judzifi» pavodle pjesy Siarhieja Kavalova, biblejskich tekstaŭ i bekietaŭskich manałohaŭ, złučanych va ŭnikalnych praporcyjach.
Premjera adbudziecca 14 lipienia a 19:00 na scenie Teatr WAM u Varšavie, Zgrupowania AK Kampinos 15.
Režysior śpiektakla, aŭtar scenaryja i kampazitar — Pavieł Pasini, aŭtarka scenahrafii, kaściumaŭ i videaprajekcyi — Alaksandra Kanarska, chareohrafka — Anna Puzio. Šmathałośsie tekstaŭ pastanoŭki hučyć u pierakładach Małhažaty Buchalik, Natalli Rusieckaj, Vasila Siomuchi i navat Franciška Skaryny.
«Kamiedyja Judzifi» — heta ŭniviersalnaja prypavieść pra sutyknieńnie čałaviečaha losu ź biaźlitasnaj mašynaj historyi, pra kanflikt pamiž asabistym ščaściem i hramadskim abaviazkam.
Zamknionaja ŭ limbie Judzif čakaje prysudu. Jaje akružyli knihi, karciny, płaścinki i filmy. Jany raspaviadajuć roznyja viersii toj samaj, adabranaj u jaje adnojčy historyi. Judzif tysiačahodździami šukaje vyjścia. Boh maŭčyć. Zatoje niastomna pracujuć miedyja. Štučny intelekt biezupynna stvaraje novyja karciny daŭno pamierłych majstroŭ. Sami jany ŭžo ničoha nie stvorać, mahčyma, ich katujuć u susiednich kamierach.
Ale heta tolki zdahadka, bo praz toŭstyja mury ničoha nie čuvać. Zvanok abviaščaje pačatak čarhovaj sieryi biaskoncaha tok-šou. Adsiečanaja hałava Ałafierna maje svaju historyju, ale hetym razam słovy majuć šaniec prahučać ad imieni Judzifi — jak častka jejnaje herstory, ačyščanaja ad čužych ujaŭleńniaŭ, mierkavańniaŭ, hukaŭ, hulniaŭ i vobrazaŭ.
Śpiektakl stavić šmat niazručnych pytańniaŭ, zakranaje prablemu patryjatyzmu, teraryzmu, pryrody tyranii i sposabaŭ baraćby ź joj. Ci moža adzin čałaviek, adna žančyna vyratavać krainu ad tyrana i ahresara? U jaki momant supraciŭ hvałtu pieratvarajecca ŭ hvałt, a fanatyčnaja viera ŭ teraryzm?
«Kamiedyja Judzifi» — heta čarhovaje supracoŭnictva polskaj pastanovačnaj kamandy neTTheatre («Teatr w Sieci Powiązań») i biełaruskich akcioraŭ ź niezaležnaj hrupy «Kupałaŭcy». U ciapierašnim palityčnym i kulturnym kantekście śpiektakl hučyć jak prahramny manifiest, mastacki pratest suprać hvałtu, hołas u imia abarony ŭsich pryhniečanych identyčnaściej.
U śpiektakli hrajuć Zoja Biełachvościk, Valancina Harcujeva, Alaksandr Harcujeŭ i Alaksandr Kazieła.
Žyvuju muzyku vykonvajuć Pavieł Pasini i Marcin Sudziński («Złodzieje Miodu»).
Pastanoŭka: Centr biełaruskaj kultury «Dośvied» / Centr Kultury ŭ Lublinie
Śpiektakl idzie na biełaruskaj movie z polskimi subcitrami.
U jaki dzień u 2020-m mahli zdarycca pieramieny? Polski dypłamat vydaŭ knihu ab pracy ŭ Biełarusi i daŭ adkaz na heta pytańnie1
Kamientary