Što pahladzieć. «Miunchien: na miažy vajny» — špijonski tryler pra Miunchienskuju zmovu, jaki pakidaje adčuvańnie dežaviu
U studzieni servis Netflix pradstaviŭ novuju stužku pra Miunchienskuju zmovu — badaj, adnu z apošnich i samych sprečnych pieradvajennych sprobaŭ spynić Hitlera. Heta padzieja 1938 hoda, kali pry pasiarednictvie zachodnich lidaraŭ Hiermanija anieksavała Sudeckuju vobłaść u Čechasłavakii.
Karcinu «Miunchien: na miažy vajny» (Munich: The edge of war) razam stvarali kiniematahrafisty z Brytanii i Hiermanii. Samaja viadomaja piersona ŭ akciorskim składzie — uładalnik Oskara Džeremi Ajrans («Łalita», «Mocny arešak», «Dom Gucci»), što bliskuča vykonvaje rolu brytanskaha premjera Neviła Čembierlena. Hałoŭnych hierojaŭ hrajuć brytaniec Džordž Makiej i niemiec Janis Nivienier — nie samyja viadomyja akciory, ale ŭ filmie jany źziajuć.
Nahadajem koratka historyju Miunchienskaj zmovy (ci Miunchienskaha pahadnieńnia, jak jašče nazyvajuć hety dakumient).
Paśla Pieršaj suśvietnaj vajny razvaliłasia Aŭstra-Vienhierskaja impieryja, i Čechasłavakija abviaściła ab suvierenitecie. Praz heta niemcy, što žyli ŭ krainie, bolš nie adčuvali siabie pryvilejavanaj nacyjaj.
Najbolš vostraj była situacyja ŭ vobłaści Sudety, dzie niemcy składali 90% nasielnictva. Siarod ich nabrała papularnaść dumka, što słavianie — bolšaść hramadzian Čechasłavakii — parušajuć ich pravy, i niemcy pačali imknucca da ŭźjadnańnia z Hiermanijaj. Hetaha ž patrabavaŭ i Adolf Hitler.
Zachodnija lidary pradčuvali, što ŭvarvańnie hitleraŭskich vojsk u Čechasłavakiju stanie pačatkam vialikaha kanfliktu na kantyniencie, tamu pajšli na sastupki.
30 vieraśnia 1938 hoda kiraŭniki Brytanii, Francyi, Italii i Hiermanii padpisali sumiesnaje pahadnieńnie, zhodna ź jakim Sudety pieradavalisia Hiermanii. Pradstaŭniki Čechasłavakii byli vymušanyja padpisać hetuju damovu pad ciskam brytanskaj i francuzskaj delehacyj.
Dva čałavieki suprać vialikaj trahiedyi
Ale ž novaja stužka ad Netflix nie tolki pra heta. Na fonie zmovy aŭtary karciny raspaviadajuć prydumanuju historyju dvuch siabroŭ — niamieckaha dypłamata Paŭla fon Chartmana i asabistaha sakratara Čembierlena Chju Lehata. U ruki chłopcaŭ traplaje dakumient, jaki dakazvaje, što Hitler nie spynicca na Sudetach i pažadaje vieści sapraŭdnuju vajnu na źniščeńnie, tamu nielha iści ź im na damovu.
«Miunchien: na miažy vajny» — toj vypadak, kali ty ŭžo viedaješ, čym skončycca stužka. Miunchienskaje pahadnieńnie, jakoje časam nazyvajuć haniebnym, nie vyratavała Jeŭropu i ŭvieś śviet ad samaj vialikaj na siońnia vajny — moža, tolki dało čas da jaje padrychtavacca. Adnak hladzieć karcinu ŭsio roŭna varta.
Siońniašniamu hledaču moža padacca znajomym adčuvańnie pieradvajennaj napružanaści, jakim prasiaknuty film. Zdajecca, niešta padobnaje va ŭmovach ukrainskaha kryzisu adčuvajem ciapier usie my, i tamu pytańni, što stavić pierad nami stužka, hučać jašče bolš aktualna.
Vosiem filmaŭ i mini-sieryjałaŭ pra tyranaŭ i dyktatury, jakija varta pahladzieć
Film tydnia: «Paralelnyja maci». Novaja stužka Almadovara, jakoj 9 chvilin apładziravali u Vieniecyi
-
Pieśnia, jakaja virusicca ŭ biełaruskim tyktoku, akazałasia saŭndtrekam da prapahandysckaha sieryjała pra vajnu
-
U centry Ryhi źjaviŭsia pomnik šeramu katu z multfilma, što pretenduje na «Oskar»
-
Ad Harbuza da Harcujevaj — ścižma zornych biełaruskich akcioraŭ źniałasia ŭ stužcy rasijskaha režysiora. Što za kino?
Kamientary