Chatni hvałt. Jak zrazumieć, što vy ŭ niebiaśpiecy i kudy źviartacca pa dapamohu? INFAHRAFIKA
U internecie zaraz źbirajuć podpisy za raspracoŭku i pryniaćcie ŭ Biełarusi zakonaprajekta pa supraćdziejańni chatniamu hvałtu. Pakul zakon tak i nie pryniaty, my nahadvajem, što takoje chatni hvałt, jakim jon byvaje, jak zrazumieć, što vy ŭ niebiaśpiecy, i, samaje hałoŭnaje, kudy źviartacca ŭ takich vypadkach.
Na hetyja pytańni adkazała Vieranika Pacepnia, jurystka biełaruskaj arhanizacyi «Centr pa prasoŭvańniu pravoŭ žančyn — Jaje pravy».
Chatni hvałt tamu i nazyvajecca chatnim, bo adbyvajecca ŭnutry siamji. Jon zdarajecca, kali adzin člen siamji hvałtuje druhoha ŭ fizičnym, psichałahičnym, ekanamičnym ci seksualnym płanie
Hvałt moža ździajśniacca ŭ adnosinach pamiž mužam i žonkaj, baćkami i dziećmi abo pamiž dziećmi.
Chatni hvałt moža być nastupnych vidaŭ:
Fizičny
Pramoje i ŭskosnaje ŭździejańnie na achviaru, kab pryčynić fizičnuju škodu. Kali vas bjuć, šturchajuć, dajuć aplavuchi, tuzajuć — heta fizičny hvałt.
Psichałahičny
Kali vas kantralujuć, pužajuć, pahražajuć, abražajuć, šantažyrujuć — heta psichałahičny hvałt.
Ekanamičny
Materyjalny cisk, kali niekamu zabaraniajecca vučycca ci pracavać, jaho pazbaŭlajuć finansaŭ albo całkam kantralujuć usie pakupki.
Seksualny
Hvałtoŭnyja dziejańni, pry jakich čałavieka siłaj, pahrozami, zmanam prymušajuć da jakoj-niebudź formy seksualnych adnosin.
Treba adznačyć, što čaściej za ŭsio vidy hvałtu nosiać kompleksny charaktar.
Siamiejny hvałt maje peŭny cykł, jaki składajecca z nastupnych pieryjadaŭ: narastańnie napružańnia — akt hvałtu — prymireńnie — «miadovy miesiac».
Narastańnie napružańnia ŭ siamji. Uzrastaje niezadavolenaść u adnosinach i parušajucca znosiny pamiž členami siamji.
Hvałtoŭny incydent. Adbyvajecca ŭspyška žorstkaści vierbalnaha, emacyjnaha abo fizičnaha charaktaru. Supravadžajecca złościu, sprečkami, abvinavačvańniami, pahrozami, zapałochvańniem.
Prymireńnie. Kryŭdziciel prynosić prabačeńni, tłumačyć pryčynu žorstkaści, pierakładaje vinu na paciarpiełaha, časam admaŭlaje toje, što adbyłosia, ci pierakonvaje paciarpiełaha ŭ pierabolšańni padziej.
Spakojny pieryjad u adnosinach («miadovy miesiac»). Hvałtoŭny incydent zabyty, kryŭdziciel daravany. Faza nazyvajecca «miadovy miesiac», tamu što jakaść adnosin pamiž partniorami na hetaj stadyi viartajecca da pieršapačatkovaj.
Paśla «miadovaha miesiaca» adnosiny viartajucca na pieršuju stadyju, i cykł paŭtarajecca. Ź ciaham času kožnaja faza stanovicca karaciej, uspyški žorstkaści pačaščajucca i pryčyniajuć bolšuju škodu. Paciarpieły nie ŭ stanie ŭrehulavać situacyju samastojna.
Kudy źviartacca, kali vy cierpicie ad chatniaha hvałtu?
- Pravaachoŭnyja orhany, milicyja. Kali vy vyrašyli pakarać kryŭdziciela, vy možacie źviarnucca ŭ pravaachoŭnyja orhany pa telefonie 102.
- Miedycynskija ŭstanovy. Kali vy paciarpieli ad fizičnaha hvałtu, vy možacie źviarnucca ŭ miedycynskija ŭstanovy pa miescy žycharstva i «źniać» paboi. U dalejšym zaklučeńnie doktara moža dapamahčy vam, kali vy vyrašycie pakarać kryŭdziciela.
- Terytaryjalnyja centry sacyjalnaha absłuhoŭvańnia nasielnictva (TCSAN). U štacie bolšaści TCSAN jość psichołahi, śpiecyjalisty pa sacyjalnaj rabocie, jakija mohuć dapamahčy razabracca ŭ situacyi, pry nieabchodnaści pieranakiravać vas u adpaviednyja ŭstanovy. Akramia hetaha, pry niekatorych TCSAN arhanizavana rabota kryzisnych pakojaŭ i adździaleńniaŭ, jakija mohuć dać časovy prytułak.
- Hramadskija arhanizacyi. U Biełarusi isnuje šerah hramadskich arhanizacyj, jakija mohuć akazać vam psichałahičnuju, sacyjalnuju, časam i jurydyčnuju dapamohu, kali vy patrapili ŭ situacyju chatniaha hvałtu.
Voś niekatoryja z arhanizacyj, kudy možna źviarnucca:
- Mižnarodnaje hramadskaje abjadnańnie «Hiendarnyja pierśpiektyvy»: https://www.genderperspectives.by/
- 8-801-100-8-801 — ahulnanacyjanalnaja haračaja linija dla paciarpiełych ad chatniaha hvałtu
- Hramadskaje abjadnańnie «Biełaruskaja asacyjacyja maładych chryścijanskich žančyn»: http://ywca.by/, http://ostanovinasilie.org/
- 8 033 603 20 32 — linija dla hramadzian u situacyi chatniaha hvałtu
- Hramadskaje abjadnańnie «Radzisłava»: https://karta-nasiliya.by
- 8 029 610 83 55 — telefon ekstranaj dapamohi dla raźmiaščeńnia ŭ prytułak dla žančyn i ich dziaciej, jakija paciarpieli ad hvałtu (kruhłasutačna)
- «Centr pa prasoŭvańni pravoŭ žančyn — Jaje pravy» http://www.eeprava.by/
- +37517 221 66 33 +37529 635 56 62 +37533 675 56 62
- Čas pracy: z paniadziełka pa čaćvier 09:00 — 17:00;
- Elektronnaja pošta: [email protected]
- Sacyjalny centr maci i dziciaci imia Hiermana Hmajniera: http://ru.belbsi.by/rights/social_belarus/organizations/?oid=8730
- 8-017-511-32-12: +37529155-32-07
Kamientary