Urad vyznačyŭsia, jakoj maje być formuła «spraviadlivaha cenaŭtvareńnia»
Urad Biełarusi vyznačyŭsia z formułaj tak zvanaha «spraviadlivaha cenaŭtvareńnia», paviedamiŭ 17 studzienia premjer-ministr Raman Hałoŭčanka. Pavodle jaho słoŭ, madel płanujuć zaćvierdzić u najbližejšy čas, paśla čaho jana budzie pradstaŭlenaja na abmierkavańnie.
Pavodle apisańnia Hałoŭčanki, novaja madel maje na ŭvazie nie pramoje rehulavańnie cen, a stvareńnie cenavych kalidoraŭ.
«My na peŭnuju madel vychodzim. U najbližejšy čas, jak ja ŭžo skazaŭ, urad jaje kančatkova zaćvierdzić i ŭžo pradstavić na abmierkavańnie ź inšymi členami kiraŭnictva krainy i prezidentam. Ale ŭ asnovie našych prapanoŭ lažać pradkazalnyja praviły pavodzin na rynku dla ŭsich: i dla vytvorcaŭ, i dla pradaŭcoŭ, i dla ŭsich pramiežkavych źvionaŭ — aptovaje źviano i roźničnaje źviano.
Meta — heta nie rehulavać ceny napramuju, a adsiakać śpiekulatyŭnyja vahańni. Dla hetaha, mahčyma, buduć uviedzienyja peŭnyja cenavyja kalidory, metaj jakich budzie źjaŭlacca fakusavańnie na toj ci inšaj prablemie, dzie my budziem bačyć uspleski ŭ canie. Heta značyć, adyści ad pramoha rehulavańnia cany pa pazicyjach dosyć šyrokaha śpiektru, pierajści ŭ režym cenavych kalidoraŭ», — rastłumačyŭ premjer.
Jon udakładniŭ, što vyznačać cenavyja kalidory dapamoža sistema «Analiz cen» i sistemy nahladu za tavarami.
«Nam u hetym dapamoža stvaranaja infarmacyjna-analityčnaja sistema «Analiz cen». Pra adnu ź ich ja ŭžo raskazvaŭ. Jana nie adna, ich budzie cełaja ijerarchija. My dobra, što svoječasova zanialisia pytańniami nahladu za tavarami, markiroŭki, ukaranieńnia elektronnych rachunkaŭ-faktur.
Heta značyć faktyčna sabraŭšy ŭ adnym miescy ŭsiu hetuju infarmacyju i navučyŭšysia sistemna mieć znosiny adzin z adnym, my budziem atrymlivać u luby momant infarmacyju ŭ realnym maštabie času pra canu luboha tavaru ŭ luboj handlovaj kropcy našaj krainy. Tamu dumajem, što heta adna z samych aptymalnych kancepcyj», — raskazaŭ Hałoŭčanka.
Pra formułu «spraviadlivaha cenaŭtvareńnia» ŭ kancy 2024 hoda zahavaryŭ Alaksandr Łukašenka.
«Cenaŭtvareńnie pavinna spraviadlivym być. I tak, kab biznesmieny i ludzi, jakija handlujuć i vyrablajuć, nie biehali za vami: dazvolcie nam pavysić, dazvolcie toje, dazvolcie heta. Jany sami pavinny viedać, u jakim kalidory jany dziejničajuć», — vykłaŭ jon tady svajo bačańnie pracesu.
U jaki dzień u 2020-m mahli zdarycca pieramieny? Polski dypłamat vydaŭ knihu ab pracy ŭ Biełarusi i daŭ adkaz na heta pytańnie6
Kamientary
Piaćdziesiat mnie
Reštu ŭ kassu.