Biełaruscy admovili ŭ vydačy polskaha prajaznoha dakumienta zamiežnika dla novanarodžanaha dziciaci
Biełarusy, jakija žyvuć u Polščy i nie mohuć viarnucca ŭ Biełaruś, kab zrabić pašpart, zvyčajna spyniajucca na afarmleńni polskaha prajaznoha dakumienta dla zamiežnikaŭ. Volha (imia źmieniena) źbirałasia aformić taki dakumient svajmu dziciaci, jakoje naradziłasia ŭ Polščy, ale atrymała admovu. MOST vyśvietliŭ čamu.
Polski prajazny dakumient inšaziemca (polski dokument podróży dla cudzoziemca) — heta časovaja zamiena paśviedčańnia asoby, jakaja vydajecca asobam biez hramadzianstva i inšaziemcam, čyj pašpart praterminavany, stračany, sapsavany, i niama mahčymaści aformić novy. Akramia taho, jaho mohuć atrymać tyja, chto nikoli nie mieŭ pašparta.
U Volhi mienavita takaja situacyja. U ich z mužam u Polščy naradziłasia dzicia, ale aformić jamu pašpart u Biełarusi jany nie mohuć: jość ryzyka palityčnaha pieraśledu.
«Z paroha skazali, što nam nie ŭdasca»
— My sabrali dakumienty pa śpisie z sajta gov.pl, i muž adpraviŭsia va ŭžond. Tam praktyčna z paroha skazali, što dakumient atrymać nie ŭdasca, bo vydajecca jon na padstavie DNŽ. A kab atrymać DNŽ, nieabchodna mieć pašpart. Atrymlivajecca zamknionaje koła, — kaža Volha.
Ciapier siamja razhladaje dva varyjanty. Pieršy varyjant — atrymać u biełaruskim konsulstvie časovy prajazny dakumient dla vyvazu dziciaci z krainy. Jon vydajecca na termin da 7 dzion, kab čałaviek moh pakinuć krainu. U teoryi hety dakumient mohuć pryraŭniać da dakumienta, jaki paćviardžaje asobu, i na padstavie jaho zrabić polski prajazny dakumient.
— Zahvazdka ŭ tym, što, kab pajści ŭ biełaruskaje konsulstva, treba mieć na rukach paśviedčańnie ab naradžeńni dziciaci z apastylem, a nakolki ja viedaju, apastyl stavicca tolki ŭ Varšavie. Ciapier u nas niama mahčymaści vyjechać tudy pa asabistych pryčynach. Tamu časova adkłali hetaje pytańnie.
«Składanaja pracedura biez harantavanaha vyniku»
Druhi varyjant siamji — atrymańnie mižnarodnaj abarony adnym z baćkoŭ, na padstavie čaho dzicia taksama moža atrymać mižnarodnuju abaronu i paźniej — prajazny dakumient zamiežnika. Siamja źviazvałasia nakont hetaha pytańnia ź Biełaruskim domam u Varšavie.
— Luby z dvuch varyjantaŭ zajmaje čas. Atrymańnie mižnarodnaj abarony mnie padajecca vielmi składanaj praceduraj biez harantavanaha vyniku. Abaronu mohuć jak dać, tak i admović u joj. A mohuć dać častkovuju abaronu, ale jana nie kacirujecca dla atrymańnia prajaznoha dakumienta, adpaviedna, pytańnie z dakumientam dla dziciaci tak i zastaniecca niavyrašanym.
Kamientary
2. Pracent admovaŭ u statusie dadakovaj abarony vielmi maleńki, mienš 1% nakolki ja pamiataju. Padavacca varta adnaznačna. Majučy na rukach rašeńnie ab dadatkovaj abaronie całkam vyrašajecca dalej pytańnie DNŽ - jon vydajecca tolki na padstavie dadakovaj abarony, jak i prajazny dakumient. Ni žyllo, ni rabota, ni dachod bolš na DNŽ nie ŭpłyvajuć.
3. U Polščy vielmi raspaŭsiudžanaja źjava, kali na miescach čynoŭniki dadumvajuć praviły sami. Toj ža piesieł u adnym užondzie tabie skažuć što nie raniej čym praź miesiac, a ŭ susiednim užondzie, ci navat prosta ŭ inšuju źmienu ŭ tym ža, daduć adrazu i sami doki aformiać.
Nakolki ja pamiataju ŭkaz pra prajazny dakumient tyčyŭsia i novanarodžanych (zaraz samomu lanota huhlić, niachaj sami hlanuć) i tady hetaja admova heta prosta zvyčajnaja samadziejnaść čynoŭnikaŭ.
Takoje spres u Polščy, zakony mianiajucca, čynoŭniki nie paśpiavajuć ci nia chočuć, a adkaznaści ŭ ich faktyčna nijakaj, tolki praz sud. Na heta i raźlik, što sudzicca nichto nia budzie. Ale to nie prablema, možna prosta pačakać pakul utrasiecca, možna samomu papisać listy va ŭstanovy vyšej ci ŭ sud. Raju miesiacok pačakać i znoŭ padacca. Niervavacca dakładna nie raju)))
Infarmacyja nie z hałavy, a z asabistaha daśviedčanyja.