Spotify razarvaŭ kantrakt ź Miehan Markł i pryncam Hary. Nie apraŭdali čakańniaŭ
Stryminhavaja płatforma Spotify razarvała kantrakt z hiercaham i hiercahiniaj Sasekskimi, u ramkach jakoha para vypuskała sieryju padkastaŭ. U sumiesnaj zajavie bakoŭ havorycca, što heta ŭzajemnaje rašeńnie, ale amierykanskija miedyja śćviardžajuć, što pryčynaj razryvu stała nizkaja pradukcyjnaść Hary i Miehan.
Kantrakt sa Spotify praduhledžvaŭ stvareńnie niekalkich raznastajnych sieryj padkastu, ale z 2020 hoda, kali jon byŭ padpisany, materyjalizavaŭsia tolki adzin prajekt — padkast «Archietypy» (Archetypes), piša Bi-bi-si.
Sa žniŭnia 2022 hoda vyjšła 12 epizodaŭ, pryśviečanych u asnoŭnym prablemam žančyn u sučasnym śviecie: stereatypam, ź jakimi jany sutykajucca, i ciažkaściam, jakija im davodzicca pieraadolvać, kab zaniać svajo miesca ŭ hramadstvie.
Haściami i surazmoŭcami Miehan Markł u padkaście stanavilisia viadomyja žančyny, naprykład, tenisistka Sierena Uiljams, śpiavačka Meraja Kery i śvieckaja lvica Perys Chiłtan.
Kantrakt sa Spotify na 25 młn dalaraŭ staŭ adnym z najbujniejšych biznes-pahadnieńniaŭ prynca Hary i Miehan Markł paśla taho, jak jany skłali ź siabie karaleŭskija abaviazki i abviaścili ab svaim imknieńni da finansavaj niezaležnaści.
Adnak praz daterminovy razryŭ pahadnieńnia ŭsioj sumy kantrakta jany nie atrymajuć, piša presa ZŠA.
Paśla zaklučeńnia pahadnieńnia sa Spotify ŭ 2020 hodzie prync Hary kazaŭ, što ich ź Miehan padkasty mohuć stać praryvam, bo jany majuć namier dać publicy mahčymaść pačuć novyja hałasy i niezvyčajnyja mierkavańni.
Padkast «Archietypy», viadučaj jakoha była tolki Miehan, sapraŭdy źbiraŭ vialikuju aŭdytoryju i ŭ śniežni minułaha hoda atrymaŭ najvyšejšuju ŭznaharodu na cyrymonii ŭručeńnia premii People's Choice Award u Łos-Andželesie.
Vytvorčaściu padkastu zajmałasia ŭłasnaja pradziusarskaja kampanija Hary i Miehan — Archewell.
«Mnie padabałasia ŭnikać u praces, siadzieć pozna ŭnačy ŭ łožku, pracavać nad scenarom, — kazała raniej Miehan Markł. — I mnie padabałasia pahłyblacca ŭ źmiastoŭnyja hutarki z maimi raznastajnymi i natchnialnymi haściami, śmiajacca i vučycca razam ź imi».
Wall Street Journal sa spasyłkaj na kiraŭnictva Archewell napisała, što Miehan praciahnie stvarać kantent dla aŭdytoryi «Archietypaŭ» na inšaj płatformie. Što heta za płatforma, pakul nie paviedamlajecca.
Razryvu kantrakta z hiercaham i hiercahiniaj Sasekskimi papiaredničała na minułym tydni zajava Spotify ab skaračeńni 200 pracoŭnych miescaŭ u departamiencie padkastaŭ.
Stryminhavy hihant patłumačyŭ heta stratehičnymi źmienami paśla maštabnych układańniaŭ u raźvićcio padkastaŭ na płatformie.
U Hary i Miehan zastajucca ŭ arsienale jašče dva bujnyja kantrakty: z kampanijaj Netflix, jakaja źniała pra ich dakumientalny sieryjał, i z vydavieckim domam Penguin Books, jaki vypuściŭ skandalnuju aŭtabijahrafiju prynca Hary «Zapasny» (Spare).
Sieryjał na Netflix vyjšaŭ u śniežni 2022 hoda, ale nie nabraŭ rejtynha, na jaki raźličvali stvaralniki.
Kamientary