U Haazie eks-kamandzira armii Kosava asudzili na 26 hadoŭ turmy za katavańni
Śpiecyjalny sud pa častkova pryznanym Kosavie asudziŭ byłoha kamandujučaha Vyzvalenčaj armii Kosava Salicha Mustafu da 26 hadoŭ turmy. Jaho pryznali vinavatym u vajennych złačynstvach. Heta pieršy prysud Haahskaha trybunała pa złačynstvach u Kosavie.
Sudździ pryjšli da vysnovy, što Mustafa datyčny da katavańniaŭ, niezakonnych zatrymańniaŭ i zabojstvaŭ. Pa danych śledstva, Mustafa ŭznačalvaŭ partyzanskuju hrupu, jakaja ŭtrymlivała jak minimum šeść kosaŭskich ałbancaŭ. Ich abvinavačvali ŭ supracoŭnictvie ź sierbami.
Źniavolenych źbivali biejsbolnymi bitami, bili tokam i katavali ahniom, im nie davali vady i ježy. Sud ličyć, što Mustafa asabista braŭ udzieł u katavańniach jak minimum dvuch źniavolenych uviesnu 1999 hoda. Mustafu aryštavali ŭ 2020 hodzie. Tady jon zajmaŭ pasadu daradcy Minabarony Kosava.
Vosieńniu 2020 hoda śpiecyjalny trybunał u Haazie pa rasśledavańni vajennych złačynstvaŭ u Kosavie pradjaviŭ abvinavačvańni ŭ vajennych złačynstvach cełamu šerahu najbolš bujnych palitykaŭ samaj maładoj dziaržavy Jeŭropy, u pieršuju čarhu prezidentu Chašymu Tačy. U adkaz toj abviaściŭ, što nieadkładna sychodzić u adstaŭku, pakolki nie žadaje paŭstać pierad sudom u jakaści kiraŭnika dziaržavy.
Akramia Tačy, abvinavačvańni byli pradjaŭleny staršyni Demakratyčnaj partyi Kosava Kadry Viesieli, byłomu staršyni parłamienta Jakupu Kraśničy i kiraŭniku frakcyi najbujniejšaj partyi kosaŭskaha parłamienta «Samavyznačeńnie» («Vetëvendosje!») Redžepu Sielimi.
Usie jany byli vysokapastaŭlenymi členami byłoj Vyzvalenčaj armii Kosava (VAK), jakaja vajavała padčas vajny 1998—1999 hadoŭ suprać sierbskaj armii. Im stavicca ŭ vinu toje, što jany ździajśniali vajennyja złačynstvy abo addavali adpaviednyja zahady, uklučajučy zabojstvy, katavańni, pieraśled i biesčałaviečnaje abychodžańnie z vajennapałonnymi.
Sudovy praces u ramkach śpiecyjalnaha trybunała dla rasśledavańnia vajennych złačynstvaŭ, učynienych u 1998—1999 hadach padčas vajny za niezaležnaść Kosava, pačaŭsia 15 vieraśnia 2021 hoda. Salich Mustafa zajaviŭ na sudzie, što nie pryznaje siabie vinavatym ni pa adnym z punktaŭ abvinavačańnia i nazvaŭ abvinavaŭcaŭ hiestapaŭcami, paviedamlaje ahienctva «AFP».
U jaki dzień u 2020-m mahli zdarycca pieramieny? Polski dypłamat vydaŭ knihu ab pracy ŭ Biełarusi i daŭ adkaz na heta pytańnie8
Kamientary