Raskazvajem pra lotčykaŭ Ničyporčyka i Kukanienku, jakija zahinuli ŭ Baranavičach
19 maja ŭ Baranavičach upaŭ vajskovy samalot JAK-130. Zahinuli dvoje piłotaŭ. Jak paviedamlaje Minabarony, pry vykanańni vučebna-trenirovačnaha palotu ekipaž vyjaviŭ techničnuju niaspraŭnaść. Lotčyki advodzili samalot ad nasielenaha punkta i ŭ vyniku katapultavalisia zanadta pozna. Palot vykonvali major Andrej Ničyporčyk i lejtenant Mikita Kukanienka.
Čytajcie: U Baranavičach raźbiŭsia vajskovy samalot. Zahinuli dva piłoty
Andrej Ničyporčyk rodam ź Lidy. Žanaty, baćka traich dziaciej.
Jon ź siamji lotčyka, ź dziacinstva viedaŭ, što budzie latać. Jaho baćka słužyŭ u Pastavach, u Prybałtycy. Usie ciažkaści žyćcia lotčyka Andrej bačyŭ na svaje vočy, ale heta jaho nie napałochała.
«Lotčyk pieršaha kłasa, dobry śpiecyjalist. Ź im lohka pracavać, jaho baćka pavinien hanarycca synam», — charaktaryzavaŭ Andreja Ničyporčyka kamandzir u siužecie dla Lidskaha telebačańnia.
Mikita Kukanienka rodam z Połacka, jamu było 22 hady. Vučyŭsia ŭ połackaj kadeckaj vučelni, u 2020 hodzie skončyŭ Vajskovuju akademiju. Ažaniŭsia, dziaciej nie było.
U siecivie možna znajści videarolik Minabarony, pryśviečany Mikitu. Tam raskazvajecca, što budučy piłot usio dziacinstva pravodziŭ u dzieda ŭ haradskim pasiołku Baravucha, dzie raźmiaščajecca viertalotnaja baza, tak i zachacieŭ stać lotčykam. Ale vybraŭ samaloty.
«Mnie padabajecca chutkaść, adčuvańnie palotu, svabody», — kazaŭ Mikita.
U płanach Mikity na 2021 było stać lotčykam 3-ha kłasa.
Dla abodvuch piłotaŭ heta byŭ nie pieršy palot na Jak-130. Naprykład, major Ničyporčyk udzielničaŭ u paradzie na Dzień Niezaležnaści na takim samalocie, vystupaŭ na mižnarodnych spabornictvach pa avijadartsu (spabornictvy va ŭmieńni pieraadolvać sistemu SPA ŭmoŭnaha praciŭnika, paražać naziemnyja abjekty z dapamohaj niekiravanych rakiet, avijacyjnych harmat i kiravanych supraćtankavych rakiet).
Mikita Kukanienka taksama admysłova vučyŭsia latać na Jak-130. Kurs, na jakim vučyŭsia Mikita, byŭ ekśpierymientalnym, mienavita tamu, što na im zasvojvali Jak-130.
Svoj vučebna-bajavy JAK-130 chłopiec nazyvaŭ latajučym kampjutaram.
«Jak tolki pieršy palot byŭ, mianie vielmi ŭraziła, ja dumaŭ: jak ja budu hetym kiravać? Try tony bajavoj zahruzki, šmatfunkcyjanalnyja indykatary. Vielmi manieŭrany samalot, šmat moža dazvolić u pavietry», — pryznavaŭsia chłopiec.
Stała viadoma imia čałavieka, jakoha siłaviki nazvali pieršym zatrymanym pa spravie «Hajuna»11
Kamientary