Eks-ideołah Zamiatalin učyniŭ skandał u «Jeŭraopcie», bo jaho absłužyli pa-biełarusku
Pra vypadak raspavioŭ Ihar Kolčanka, dyrektar pijar-ahienctva Sette.
Kanflikt pamiž niezadavolenym kupcom i pradavačkaj adbyŭsia ŭ «Jeŭraopcie», jaki znachodzicca ŭ handlovym centry «Halereja» na praśpiekcie Pieramožcaŭ. U hetaj kramie kasiry pa zmoŭčańni źviartajucca da klijentaŭ pa-biełarusku.
«Mužčyna vielmi hučna pačaŭ aburacca i kryčać, nielha było nie zaŭvažyć. Jamu nie spadabałasia, što pradavačka havaryła ź im pa-biełarusku, — raspavioŭ Ihar Kolčanka. — Jon pačaŭ kryčać na dziaŭčynu: «Dy nie chaču ja havaryć na vašaj dołbanaj movie. Kanstytucyju pačytajcie i adkazvajcie mnie pa-rusku!»
Vyjaviłasia, što aburanym kupcom akazaŭsia Uładzimir Zamiatalin, były hałoŭny ideołah krainy.
Praŭda, sam Zamiatalin spačatku admoviŭsia kamientavać svarku z pradavačkaj. «Nie razumieju, pra što vy kažacie. Vaša mova nie biełaruskaja, a stararuskaja. Chopić mnie chłusić», — adkazaŭ jon karespandentu «NN». Ale paśla pierazvaniŭ sam i ŭdakładniŭ svaju pazicyju:
«Absłuhoŭvajučy piersanał pavinien razmaŭlać na toj movie, na jakoj da jaho źviartajucca. Paŭsiul heta norma. Uvohule, ja nie razumieju, u čym šum i intares. Ničoha zvyšnaturalnaha nie adbyłosia».
Ale ci adkazvaŭ jon pa-biełarusku, kali byŭ čynoŭnikam? «Kali da mianie źviartajucca pa-biełarusku i ja razumieju, što kažuć, ja adkazvaju pa-rusku. Kali nie razumieju, to tak i kažu. Ale vučyć movu ŭ 70 hadoŭ nie źbirajusia», — kaža eks-ideołah.
Zamiatalin zapeŭnivaje, što jamu padabajecca biełaruskaja kultura, i nijakaj pychi ŭ jaho niama. «Ale jość praŭda historyi», — padsumoŭvaje jon.
Sioleta Uładzimiru Zamiatalinu spaŭniajecca 70 hadoŭ. Jon rodam z rasijskaj Tuły, skončyŭ Danieckaje vyšejšaje vajenna-palityčnaje vučylišča, paśla słužyŭ u vojsku palitrukom u Hiermanii, Dalnim Uschodzie. U vyniku los zanios Zamiatalina ŭ Biełaruś, dzie jon uznačaliŭ pres-słužbu Minabarony. Mieŭ zvańnie pałkoŭnika.
Zatym Zamiatalin byŭ pres-sakratarom Savieta Ministraŭ, vice-premjeram, a taksama namieśnikam kiraŭnika Administracyi prezidenta, adkaznym za ideałohiju. Pry časie jaho kiravańnia cisk na biełaruskuju kulturu byŭ najmacniejšym.
Pry kancy karjery Zamiatalin uznačalvaŭ «Biełaruśfilm», fihuravaŭ jak pradziusar niekalkich biełaruska-rasijskich filmaŭ na vajennuju tematyku: «Bresckaja krepaść», «U červieni 41-ha», «Snajpier: zbroja adpłaty».
Čytajcie taksama: Zamiatalin pra moŭny kanflikt u kramie: «Absłuhoŭvajučy piersanał pavinien razmaŭlać na toj movie, na jakoj da jaho źviartajucca»
«Jeŭraopt»: Pretenzii pakupnika da kasirki nie apraŭdanyja
Stała viadoma imia čałavieka, jakoha siłaviki nazvali pieršym zatrymanym pa spravie «Hajuna»34
Kamientary