«Nastroj taki sabie». Biełaruska z Kalifornii pra abłavy na mihrantaŭ u ZŠA
Adzin ź pieršych ukazaŭ, padpisanych Donaldam Trampam paśla viartańnia ŭ Bieły dom, abrynuŭsia suprać mihrantaŭ. Ludziej, jakija nie majuć zakonnych padstavaŭ žyć u ZŠA, zatrymlivajuć sotniami. Biełaruskaja kalifarnijka Maryja Jafimava ŭ razmovie z «Biełsatam» pryznałasia: u dyjaspary «adčuvajecca napružańnie».
«Napružańnie ŭ dyjaspary adčuvajecca. Ahulny nastroj taki sabie, asabliva ŭ tych, chto jašče ŭ pracesie lehalizacyi ci nie maje jaje», — adznačyła ŭ razmovie z «Biełsatam» siabroŭka ŭpravy Asacyjacyi biełarusaŭ u Amierycy Maryja Jafimava.
Biełaruska žyvie ŭ San-Dyjeha zusim blizka ad miažy ZŠA ź Mieksikaju. Kaža, imihracyjnaja palicyja čynić sapraŭdnyja abłavy suprać zamiežnikaŭ — najpierš mieksikancaŭ:
«Mieksikancaŭ prosta chapajuć pačkami: kala kramaŭ, doma, bo viedajuć, dzie tyja žyvuć, chodziać z abłavami. Hety zakon najpierš suprać mieksikancaŭ, chacia Tramp nie moža tak skazać, bo heta rasizm».
Donald Tramp u pieradvybarčaj prahramie abiacaŭ uziacca za mihrantaŭ, i adzin ź pieršych zakonaŭ, padpisany im u pieršy ž dzień na pasadzie prezidenta, praduhledžvaje departacyju zamiežnikaŭ, jakija zastajucca ŭ ZŠA bolš za dva tydni i mienš za dva hady dy nie majuć nieabchodnych dakumientaŭ.
Jafimava adznačaje: mihrantam, jakija ŭ pracesie lehalizacyi, vysyłka nie pahražaje, ale impet, ź jakim ułady nakinulisia na zamiežnikaŭ, trochi biantežyć biełarusaŭ:
«U ludziej tryvožny nastroj: kali chutka sud ci intervju na palityčny prytułak (tam roznyja pracedury), to ŭsio adno ludzi chvalujucca. Kiejsy palityčnaha prytułku razhladajucca bolš pilna: zamiest dvuch intervju, što byli raniej, ciapier užo, try asoby kazali, iduć na piataje. Raniej takoha zvyčajna nie było. Pieršaje intervju, druhoje — i tabie kažuć vynik».
Surazmoŭca narakaje, što šmat chto nie viedaje pravoŭ ci nie moža dazvolić sabie advakata, i heta pahražaje niepryjemnaściami:
«Byŭ vypadak ź biełarusam-kiroŭcam, u jakoha spraŭdzili dakumienty i chacieli zabirać. Dali zvanok, dobra, što tam žonka ściamiła, sfatahrafavała dakumienty, što jon užo padaŭsia na palityčny prytułak. To bok asoba nie viedaje, što treba pakazvać hetyja dakumienty. Kali b nie žonka, mužčynu zabrali b, i nieviadoma, kolki b jon tam prasiadzieŭ u pastarunku, pakul raźbiralisia b».
Asacyjacyja biełarusaŭ u Amierycy ciapier namahajecca stvaryć štości nakštałt haračaj linii, dzie buduć kansultavać u mihracyjnych spravach: «My hetym zajmajemsia, dumaju, na hetym tydni zrobim, kansultujemsia z praŭnikami».
U listapadzie imihracyjnaja i mytnaja palicyja ZŠA (ICE) skłała departacyjny śpis, u jaki załučanyja 323 hramadzianiny Biełarusi. Ahułam u pieraliku — amal 1,5 młn hramadzianaŭ 205 krainaŭ.
Kamientary