U Rasii pjanyja biełarusy žorstka źbili ŭźbieka. A potym pryviazali jaho za nahu da traktara i kinuli pamirać na darozie

Śviatkavańnie Novaha 2024 hoda ŭ vioscy Karžava Dzierniakoŭskaja, što ŭ Naŭharodskaj vobłaści, pierarasło ŭ žorstkaje złačynstva, jakoje ździejśnili hramadzianie Biełarusi.

Za śviatočnym stałom sabralisia piać čałaviek, usie pracavali na miascovaj fiermie. Siarod ich byŭ 40-hadovy ŭpraŭlajučy Dźmitryj Stryžnieŭ i 32-hadovy Illa Viličynski. Abodva niekalki hadoŭ tamu pierajechali ŭ Rasiju ź Biełarusi. Mužčyny byli zadavolenyja pracaj, u kaleh pretenzij da ich nie ŭźnikała, piša «Provincija».

Novym čałaviekam u kampanii byŭ 62-hadovy ŭźbiek pa imieni Chałturá. Na fiermu jon uładkavaŭsia za miesiac da złaščasnaha zastolla, pa-rusku havaryŭ drenna. Pracavaŭ jon staranna, tamu jaho zaprasili adśviatkavać Novy hod u kampanii. Na stoł pastavili harełku, šampanskaje i dobruju zakusku, Chałtura pryhatavaŭ dla tavaryšaŭ tradycyjny ŭźbiekski płoŭ. 

Zastolle pačynałasia viesieła i ŭ pryjaznaj atmaśfiery. Niezadoŭha da boju kurantaŭ mužčyny zachacieli pahladzieć zvarot Pucina. Pakolki televizara ŭ domie nie było, jany pajšli ŭ ofis haspadarki, jaki znachodziŭsia niepadalok. Doma zastaŭsia tolki Chałtura.

Pahladzieŭšy televizar, troje siabroŭ vyjšli na vulicu paŭzryvać pietardy. Viličynski ž adpraviŭsia dachaty. Na śledstvie jon raskazaŭ, što ŭbačyŭ unutry dziŭnuju karcinu: Chałtura stajaŭ pasiarod pakoja ź dzikavatymi vačyma, a na padłozie lažała pierakulenaja navahodniaja jełka, jakuju mužčyny ŭpryhožvali ŭsie razam. 

Viličynski spytaŭ u kalehi, što zdaryłasia. Ale jak tolki jon nabliziŭsia da Chałtury, toj raptam udaryŭ jaho nažom. Ranieńnie akazałasia niesurjoznym, ale Viličynski na ŭsialaki vypadak vyskačyŭ z chaty, začyniŭ dźviery na kluč i pabieh pa dapamohu da tavaryšaŭ.

Viličynski raspavioŭ pra ŭsio Stryžnievu, i jany razam pajšli raźbiracca z Chałturoj. Ale dźviery nie adčynialisia. Akazałasia, što Chałtura rychtavaŭsia da ich prychodu: jon zamknuŭ dźviery znutry na zavału. Tady siabry vyrašyli skarystacca technikaj.

Spačatku jany pasprabavali adčynić dźviery bałharkaj, ale nie atrymałasia. Tady jany padahnali da doma traktar «Biełarus», prymacavali tros da dźviarej i sarvali ich. 

U pamiaškańni mužčyny ŭbačyli Chałturu, jaki zabiŭsia ŭ kut. Jon staŭ na nohi, ale tut ža byŭ źbity ŭdaram kułaka. Viličynski i Stryžnieŭ stali žorstka źbivać uźbieka rukami, nahami, a taksama palenam i viasłom, jakija apynulisia pad rukoj. Sudmiedekśpiertyza pakazała, što na ciele Chałtury nie było žyvoha miesca.

Ale źvierskaha źbićcia mužčynam padałosia mała. Jany vyciahnuli paciarpiełaha na vulicu i stali katavać jaho z dapamohaj traktara. Viličynski i Stryžnieŭ adčapili tros ad dźviarej, pierakinuli jaho praz dapamožnuju labiodku tak, što druhi kaniec pavis u niekalkich santymietrach ad ziamli, a potym pryviazali da jaho adnu z noh Chałtury.

Stryžnieŭ sieŭ za rul i padniaŭ labiodku na vyšyniu kala dvuch mietraŭ nad ziamloj, paśla čaho pavioz padviešanaha na trosie ŭniz hałavoj Chałturu da darohi, jakaja prachodzić niedaloka ad fiermy.

Dajechaŭšy da trasy, Stryžnieŭ kinuŭ mužčynu, jaki byŭ biez prytomnaści, prosta na darozie i viarnuŭsia na fiermu. Chałtura byŭ bieź vierchniaha adzieńnia i abutku, u tuju noč termomietr pakazvaŭ 28 hradusaŭ marozu. 

Praz paŭhadziny Chałturu znajšli vypadkovyja ludzi, jakija jechali mima fiermy. Jany vyklikali chutkuju, ale vyratavać mužčynu nie ŭdałosia.

Viličynskaha i Stryžnieva nieŭzabavie zatrymali. Vinu jany pryznali častkova. Sud pryznačyŭ kožnamu pa siem hadoŭ pazbaŭleńnia voli pa artykule ab naŭmysnym pryčynieńni ciažkaj škody zdaroŭju, što paciahnuła pa nieaściarožnaści śmierć. 

Sud pahadziŭsia, što złačynstva «ździejśniena z asablivaj žorstkaściu, pakutami dla paciarpiełaha». Ale adnym sa źmiakčalnych vinu abstavin pryznana supraćpraŭnaść pavodzin paciarpiełaha, jakaja stała padstavaj dla złačynstva. Pry hetym daktary ŭstanavili, što nažavoje ranieńnie Viličynskaha było lohkim i nie pahražała jahonamu žyćciu.

U minułym abodva asudžanyja charaktaryzavalisia vyklučna stanoŭča.

• 0
• 2
• 5
• 37
• 24
• 1
• 13
• 0