Tualetnaja papiera razładu. Taksičnyja adnosiny biełaruski ź viečna niezadavolenaj maci šakujuć internet
«Usio, što ni zrabi — usio drenna». Videa homielskaj błohierki pra jaje sustrečy z maci, jakija pastajanna zakančvajucca krytykaj pa drobiaziach, źbirajuć miljony prahladaŭ i tysiačy aburanych kamientaroŭ.
Sproba prymirycca
U pačatku hoda błohierka Lera Pamieła (@lera_pomela) vyrašyła adnavić adnosiny z maci, ź jakoj nie mieła suviazi amal try hady. Naturalna, na publiku, paviedamlajučy ŭsie padrabiaznaści padpisčykam.
Kupiŭšy dla maci jaje lubimyja limonnyja vafli, dziaŭčyna padjechała da jaje doma i prapanavała pa telefonie prymirycca.
«Nie pamiataju, kab u mianie takaja dačka była, niešta piać hadoŭ ciabie nie vidać», — adkazała žančyna, nie zabyŭšysia vykazać kryŭdy za toje, što ŭ čas chvaroby joj dapamahali čužyja ludzi. Adnak dačku ź jaje mužam usio ž puściła na paroh.
Haściniec maci, adnak, nie spadabaŭsia. «Vafielki? A ja dumała, ty mnie kaŭbasy ci miaska pryviazieš. Tabletki choć by pryviezła dla serca, jakija mnie patrebnyja, bo mnie niama ŭžo za što kupić, piensija skončyłasia», — paskardziłasia jana.
U hetym jaje mnohija kamientatary padtrymali — zanadta drobny prezient dla maci, jakuju dačka nie bačyła niekalki hadoŭ.
Zdrada maci
Lera tłumačyć u tyktoku, što abvinavačańni maci biespadstaŭnyja. Jana trymała suviaź ź joju praź ciotku i navat pieradavała hrošy, kali taja trapiła ŭ balnicu, ale nie rašałasia zrabić pieršy krok da prymireńnia praz ułasnuju hordaść.
Razład pamiž imi pačaŭsia paśla svarki Lery z mužam, kali jana sabrała rečy i pajšła žyć da baćkoŭ, ale padtrymki nie atrymała. Dziaŭčynu pastajanna paprakali, što mužčyna zaŭsiody maje racyju, a jana vinavataja sama. Lera adčuvała siabie čužoj u domie: nie mahła karystacca praduktami z chaładzilnika, bo nie kuplała ich, i nie mieła hrošaj, kab schadzić u kramu. Kali jana paprasiła ŭ maci pazyčyć na ježu, atrymała adkaz:
«Ty zamužam, telefanuj mužu, niachaj jon ciabie kormić».
Paźniej Lera daviedałasia, što maci pierapisvajecca ź jaje mužam, imknučysia prymusić dačku viarnucca ŭ siamju. Choć Lera z mužam pamiryłasia, takuju zdradu maci jana doŭha daravać nie mahła.
Kvaternaje pytańnie
U niekatorych videa Lera žartuje, što viarnułasia mirycca, kab maci nie pierapisała kvateru na katoŭ. Niezrazumieła, ci sapraŭdy ŭ siamji jość pytańnie nakont kvatery, ci heta tolki viersija, jakoj trymajecca maci.
Lera časam iranizuje, prosiačy maci pierapisać žyllo na jaje, ale, zdajecca, žančyna ŭsprymaje hetyja žarty surjozna i navat pryhraziła adabrać klučy:
«Paśla vykinieš mianie, i ŭsio. Nafih treba».
«Doma pajaścio!»
Nastupny vizit Lery da maci byŭ z bolš značnym padarunkam — jana zakazała prafiesijnuju ŭborku dla jaje kvatery. Adnak žančynie taki siurpryz nie spadabaŭsia:
«A samoj što, upadłu prybrać?»
Žančynie stała soramna, što ŭborkaj zajmalisia čužyja ludzi, a nie jaje dačka. U dadatak jana vykazała niezadavolenaść: «Hetyja hrošy ty mahła b i mnie dać!»
Pry hetym sama žančyna nijakaj haścinnaści da svajoj dački i ziacia nie prajaŭlała, navat nie staviła čajnik. «Doma pajaścio!» — absiakała maci zaŭvahi dački.
Nie taja papiera, nie toje sała
Apošni kanflikt pamiž Leraj i jaje maci dasiahnuŭ absurdu. Lera pryniesła dva rułony tualetnaj papiery, bo zaŭvažyła, što papiera ŭ maci zakančvajecca. Adnak zamiest udziačnaści žančyna pačała skardzicca:
«Dyk ja ž nie takuju biaru. Ty samuju tannuju, napeŭna, uziała? Mahła b uziać dobruju, darahuju, trochsłojnuju! Ja spadziavałasia, što takuju kupiš. Maci i takaja pojdzie… Sabie, napeŭna, darahuju biareš, a mnie takuju padsunuła».
Dačka zapeŭniła, što hetaja papiera takaja ž, jak była ŭ maci raniej, ale taja zajaviła, što ŭ jaje prosta nie było hrošaj na lepšuju. Kamientatary padzialilisia, niekatoryja adznačali, što sapraŭdy možna było i lepšuju papieru ŭziać.
Kab dakazać, što reč zusim nie ŭ takoj drobiazi, jak tualetnaja papiera, praź niekalki dzion Lera znoŭ pryjechała da maci ŭžo ź dźviuma ŭpakoŭkami darahoj tualetnaj papiery i kavałkam sała. Ale maci i hetym razam zastałasia niezadavolenaj:
«A adrazu nie mahła? Užo jak vykazałasia, dyk prypiorła?»
Sała taksama stała pradmietam sprečki. Maci zajaviła, što heta padarunak, kab jana «z tualeta nie vyłaziła», i dačka mahła b prynieści i lepšaje:
«Sabie ź lubaviznaj kuplajecie, a mnie adno sała prypiorli!»
Dačka była vielmi ździŭlenaja, bo maci zaŭsiody addavała pieravahu čystamu sału. Adnak taja zajaviła, što dačka pavinna dobra viedać jaje husty i razumieć, što lubavizna taksama joj padabajecca.
«Jaje lubimyja kvietki nie hartenzija, a pretenzija»
Niekatoryja ŭ kamientarach hadali: ci hetaja historyja nie vydumka, žart? Bo ciažka ŭjavić takoje staŭleńnie maci da svajho dziciaci. Inšyja bačyli pieršyja prajavy ahresiŭnaj demiencyi.
Adnak bolšaść była aburanaja žorstkaściu i patrabavalnaściu žančyny. Mnohija dzialilisia ŭłasnym dośviedam stasunkaŭ z taksičnymi baćkami.
«U kaho nie było składanych adnosin z maci, toj nie zrazumieje, nakolki heta ciažka».
«Prynieśli b čyrvonaj ikry, skazała b: «Čamu tak mała?» Niama słoŭ».
«Kali b pryvieźli kaŭbasu i leki, jana b skazała: «Čamu nie miod i ryba?» Ad takich treba biehčy, bo jany zrobiać vašaje žyćcio piekłam», — pisali ludzi.
Kamientatary raili ŭ takich abstavinach abryvać stasunki, kab abaranić siabie ad dalejšych pakut.
«U mianie taksama takaja maci — achviara. Piensii nie chapaje, kaŭbaska patrebna, leki. Što ni zrabi, ty ŭsio roŭna joj vinnaja. Ja nabrałasia śmiełaści spynić znosiny i ciapier žyvu ŭ zhodzie z saboj».
«Ad taksičnych znosin treba pazbaŭlacca, navat kali heta tvaja maci», — padsumoŭvajuć u kamientarach.
«Naša Niva» — bastyjon biełaruščyny
PADTRYMAĆStała viadoma, jak dobra ŭładkavaŭsia ŭ žyćci muž starejšaj unučki Łukašenki12
Kamientary
«Ty zamužam, telefanuj mužu, niachaj jon ciabie kormić».
absolutno triezvoje i adiekvatnoje zamiečanije matieri. Ty zamužiem słušajsia muža.