«Plavać ja chacieŭ na hety Zachad». Hałasavańnie Łukašenki pačałosia z dvuch prakołaŭ. A voś jakija zajavy jon zrabiŭ

U Biełarusi 26 studzienia adbyvajucca «prezidenckija vybary». Ich vynik pradvyznačany, jak i scenar. Jak čakajecca, Alaksandru Łukašenku napišuć kala 90% hałasoŭ.

Učastak, dzie hałasuje Alaksandr Łukašenka, ličycca ŭčastkam №1, jon znachodzicca va Univiersitecie fizkultury. Hałasavać Łukašenka prybyŭ z synam Kolem, Natallaj Kačanavaj i špicam Umkaj. Umka dazvoliŭ sabie volnaść: padniaŭ łapu kala ściany.

Pry hetym u Biełarusi isnuje zakon, jaki zabaraniaje pryvodzić žyvioł u kramy, ustanovy achovy zdaroŭja i adukacyi, abjekty kultury i sportu. Pryčym hety zakon byŭ pryniaty pry Alaksandru Łukašenku.

Jašče adzin prakoł dapuściła dziaržaŭnaje telebačańnie. Jano zaśviaciła realnuju jaŭku na ŭčastku.

Pavodle aficyjnych danych, u Biełarusi nibyta prahałasavała ŭžo bolšaść vybarcaŭ, 42% pry hetym nibyta prahałasavali daterminova — hałasavać zahadzia ŭłady zmušali ŭsich rabotnikaŭ dziaržaŭnaha siektara, siłavikoŭ i studentaŭ. Pry hetym, kab nichto nie bačyŭ, jaki na samaj spravie pracent prahałasavaŭ, členy kamisij zakryvajuć śpisy admysłovymi listami. Ale ŭ vypadku z Łukašenkam śpis trapiŭ u kadr: Łukašenka tam byŭ tolki druhim.

Pavialičyć

Paśla hałasavańnia Alaksandr Łukašenka pravioŭ tradycyjnuju doŭhuju pres-kanfierencyju z žurnalistami. Pryčym hetym razam u krainu dapuścili vialikuju kolkaść zamiežnych karespandentaŭ — prytym što niezaležnyja ŚMI ŭ krainie zabaronienyja, a dziaržaŭnyja pracujuć pad strohim kantrolem śpiecsłužbaŭ pa centralizavanych mietadyčkach.

Łukašenka patłumačyŭ svaje prablemy z hołasam. Jon raskazaŭ, što pieranios hryp.

U palityčnych zajavach Łukašenki nie prahučała ničoha novaha. U pryvatnaści, jon pa-raniejšamu admaŭlajecca ad dyjałohu z apazicyjaj i maje namier praciahvać palityčnyja represii. 

«Vy viedajecie, apazicyja — heta tyja, chto znachodzicca ŭ krainie. A dyjałoh ja hatovy vieści z tymi, ad kaho niešta zaležyć», — zajaviŭ Łukašenka, adkazvajučy na pytańnie niamieckich žurnalistaŭ, ci hatovy jon vieści dyjałoh z apazicyjaj.

Jon taksama pa-raniejšamu abražaŭ Zachad i ŭsie susiednija krainy, akramia Rasii.

Jon abvierh, što vyzvalaje palitviaźniaŭ u jakaści žesta dobraj voli dla Zachadu.

«Publična vam zajaŭlaju: nie chočam vykarystoŭvać hety praces dziela sihnału Zachadu. Plavać ja chacieŭ na hety Zachad», — skazaŭ Alaksandr Łukašenka. 

Zajavy na adras novaabranaha prezidenta ZŠA Donalda Trampa byli supiarečlivyja. Łukašenka pryznaŭ, što nie viedaje, čaho čakać ad novaj amierykanskaj administracyi.

Łukašenka ličyć, što ciapierašni prezident ZŠA zdolny na toje, kab dziejničać «ałahična» ŭ paraŭnańni z tradycyjnaj palitykaj ZŠA. «My na heta spadziajomsia», — skazaŭ Alaksandr Łukašenka.

«Donald — kłasny artyst, akcior. Jon šoumien, biźniesmien i inšaje. Vielmi kłasny. Jon umieje heta rabić. U jaho taki charaktar, što jon nie saromiejecca heta rabić, — skazaŭ Łukašenka. — Jak vopytny palityk, mušu skazać, što ja nie zusim razumieju i nie viedaju, što źmienicca ŭ nas u našym rehijonie paśla prychodu da ŭłady Trampa».

U toj ža čas Alaksandr Łukašenka zaklikaŭ «mienš źviartać uvahu na roznaha rodu zajavy ŭ ZŠA, jakija ŭ pieršuju čarhu raźličany tolki na rezanans u ŚMI». U hetym płanie jon paraiŭ brać prykład z Kitaja, dla jakoha heta ŭ paradku dnia 25-je pytańnie.

«My nie čakajem ad Amieryki niejkich «padarunkaŭ», ale my chočam ź imi supracoŭničać», — skazaŭ Łukašenka.

Łukašenka asudziŭ žest Iłana Maska na inaŭhuracyi. Ale sam pry hetym zihanuŭ.

«Čym by jany heta ni abhruntoŭvali, kali jon tam zihuje adkryta, — heta abnahleli amierykancy ŭžo i hety Mask. Čamu jaŭrei heta spakojna prahłynuli? Pad hetym ziham Chałakost byŭ ździejśnieny. Nivodny jaŭrej Maska nie asudziŭ i Trampu nie skazaŭ, što vy robicie tam, — zaŭvažyŭ Łukašenka. — Što ty vychodziš na ekran i na miljony ludziej zihuješ? Kamu ty dabro prynosiš? Bo my z amierykancami suprać hetaha zmahalisia. Heta ŭžo ačmureli i adureli».

Na adras Polščy Łukašenka paŭtaryŭ svaje raniejšyja chłuślivyja zajavy ab tym, što Varšava pretenduje na Zachodniuju Biełaruś i Ukrainu.

Choć Polšča nikoli takoha nie dekłaravała, a naadvarot, zafiksavała padtrymku niezaležnaści i cełasnaści Biełarusi i Ukrainy ŭ jakaści hałoŭnaha pryjarytetu svajoj zamiežnaj palityki. 

Łukašenka taksama raskazaŭ pra svajo bačańnie kampramisu dla miru va Ukrainie pa stanie na siońnia.

«Kampramis moža być taki. Uładzimir Uładzimiravič [Pucin] niadaŭna skazaŭ: vychodźcie za miežy abłaściej — Danbas, Łuhanskaja vobłaść, potym Chierson, Zaparožskaja vobłaść. Tudy — da miež. Usio — spyniajemsia. Ale, napeŭna, nie zusim… Toj ža [ukrainski bok] adychodzić na miežy nie budzie. Nu tady što? Nu tady nie patrabujcie, kab my vam viarnuli terytoryi i Azoŭskaje mora, jakija kaliści byli ŭkrainskimi. Voś kampramis, kab spynicca na linii sudakranańnia. Mahčymy. Heta majo takoje mierkavańnie. Ale Uładzimiru Zialenskamu i Uładzimiru Pucinu vidniej. Jany tam niepasredna pahružany ŭ heta. Ale kampramis daviadziecca znajści. Z raźlikam na toje, što pryjdzie čas, narody vyznačacca, dzie im žyć i jakuju valutu vykarystoŭvać», — miarkuje Łukašenka.

 Jeŭropu Łukašenka zaklikaŭ dystancyjavacca ad ZŠA i «damovicca z Rasijaj».

«U Jeŭropy adzin šlach, razumny šlach — pravodzić svaju palityku. Hrošy jość, technałohii jość. Patrebnyja resursy. Jany tut, na biełaruska-rasijskaj prastory. Jany ŭ Rasii. Damoŭciesia z Rasijaj. Jany ž vam hatovyja pryrodny haz tańniej pradavać, naftu tańniej. I kali z Rasijaj damovicca, jakaja Amieryka, navat Kitaj nie daść rady hetamu abjadnańniu, — padkreśliŭ Alaksandr Łukašenka. — Čamu heta nie adbyvajecca? Heta ž možna zrabić, ja kažu vam jak prezident. Pa-biełarusku kažučy, «duchu nie chapaje». Niama kamu pryniać takoje rašeńnie», — žuryŭsia jon.

Alaksandr Łukašenka taksama čarhovy raz kakietničaŭ nakont rašeńnia zastavacca na pasadzie prezidenta. Zajaviŭ, što nie chacieŭ iści na vybary, bo «čysta vonkava niejak nieprystojna — 30 hadoŭ va ŭładzie». Uhavaryła jaho pieranaznačyć siabie jašče na adzin termin byccam Natalla Kačanava: «Ja jaje takoj nikoli nie bačyŭ. Jak tak? Vy što, nas kidajecie? Vy pojdziecie? My nie hatovyja siońnia, kažuć».

Jon u čarhovy raz skazaŭ, što nie źbirajecca addavać uładu dzieciam, a novaha prezidenta zaklikaŭ šukać siarod ministraŭ i čynoŭnikaŭ. Ale tolki nie žančynu, bo «žančyna nie moža być dyktataram».

Łukašenka raskazaŭ, kudy ździejśnić pieršy aficyjny vizit paśla vybaraŭ — u Rasiju. 

• 1
• 8
• 7
• 27
• 1
• 0
• 20
• 0