$1.000.000 za ŭvachod na cyrymoniju i pjanka z «dobrymi ruskimi» — Prakopjeŭ raskazaŭ pra svoj dzień inaŭhuracyi Trampa ŭ Vašynhtonie

Dalej stenahramaj idzie prostaja mova Vadzima Prakopjeva. 

Pavialičyć

«Što ja rabiŭ u dzień inaŭhuracyi?

Mnie pryjšła (my pa damoŭlenaści nie nazyvajem ad kaho — NN) prapanova z prejskurantam: za $5000 možna było trapić na malitoŭny śniadanak i potym u kłub; za $20.000 na bal vajskoŭcaŭ u hateli Fairmont. Za $50.000 usio toje ž, ale z VIP-raźmiaščeńniem. Za $1.000.000 možna było trapić na hałoŭny bankiet.

Ja padziakavaŭ za prapanovu i adkłaniaŭsia, skazaŭšy, što pajedu pašukaju bankamat.

Adhuknuŭsia ja na inšaje zaprašeńnie: uziaŭ butelku Amarone i pajšoŭ u Pasolstva Alternatyŭnaj Rasii, jakoje ładziŭ Illa Panamaroŭ.

Pavialičyć

Heta majontak z vyhladam na Kapitolij, ź iraničnaj vyvieskaj «Vašynhtonski Abkam». Ja starajusia tam byvać — prychodziać vielmi cikavyja śpikiery i ŭvohule možna šmat daviedacca z kułuarnych razmoŭ.

Na hety raz haściami-śpikierami byli Kanstancin Baravy i śpiecyjalny hość z Ukrainy.

Cikava było abmierkavać palityčnyja momanty ź Illom Panamarovym i pasłuchać uspaminy Kanstancina Baravoha. 

U 2004 hodzie na forumie biełaruskaj apazicyi ŭ Minsku, pavodle ŭspaminaŭ Baravoha, jon prapanavaŭ asabista prafinansavać dva biełaruskija partyzanskija padraździaleńni. Prapanavaŭ nazvać adno — imia Navadvorskaj, a druhoje — imia Rejhana.

Kanstancin Baravy ličyć, što niama takoha palityčnaha hulca jak Łukašenka. Jość tolki Pucin. Tak i treba ŭsio ŭsprymać. Ja vietliva nie pahadziŭsia. Na moj pohlad, heta raspaŭsiudžanaja, ale sproščanaja karcina śvietu, jakaja zaminaje jasna dumać.

Pavialičyć

Illa Panamaroŭ razvažaŭ pra arhanizacyju ŭkrainskaj palityki — nie mahu publična pierakazvać usio. Mahu tolki častkova.

Ja padzialiŭsia ź im svajoj tryvohaj, što Ukraina ryzykuje patrapić u pravasłaŭnaje praklaćcie ŭ suviazi z tym, što Zialenski nie zachoča addać uładu. Ale mianie supakoili — va Ukrainie matryjarchat, i Alena Zialenskaja zaścieraže muža ad takoj pamyłki.

Illa Panamaroŭ uspomniŭ, jak byłoje kiraŭnictva Pałka Kalinoŭskaha pierakonvała jaho va Ukrainie, što Sachaščyk i Prakopjeŭ — ahienty KDB. Paśmiajalisia. 

Daviedaŭsia cikavy fakt pra Oliviera Stoŭna. Nahadvaju čytačam, što hety vydatny amierykanski kiniematahrafist źniaŭ niečakana kamplimientarnaje, siervilnaje dakumientalnaje kino z Pucinym u 2017-m.

Ja raniej dumaŭ, što mister Stoŭn zrabiŭ heta z pryčyny ŭłasnych pierakanańniaŭ. Raspaŭsiudžany vypadak blizarukaści. Stoŭn — levy z Halivuda. Vieryć u amierykanski ahresiŭny impieryjalizm. Ubačyŭ u Pucinie sajuźnika.

Učora na pryjomie ŭ «Abkamie» daviedaŭsia, što Stoŭn atrymaŭ $40 miljonaŭ za hety film. Hrošy nie pachnuć.

Abmiarkoŭvali, kaniečnie ž, čaho čakać ad novaj amierykanskaj administracyi. Ja ŭ hetym sensie aptymist. Amieryka razvaročvajecca. I razvaročvajecca chutka. Chtości ŭbačyć u hetym pierśpiektyvu aŭtarytaryzmu. Ja ž pierakanany, što jany pierabudoŭvajucca, kab vyjhrać vajnu.

Ja taksama liču, što pieramovy Tramp—Pucin, kali, viadoma, Pucina pierakanajuć u ich udzielničać, nie abiacajuć nam «źlivu Ukrainy». Choć by pa dźviuch pryčynach:

— Tramp jak čałaviek z hihanckim eha nie moža dazvolić sabie vyhladać jak toj, chto sastupiŭ Pucinu;

— Kitaj hladzić uvažliva. Kali Amieryka daść słabinu va Ukrainie, Si Czińpin natchnicca, i imaviernaść «karybskaha kryzisu» na Tajvani vyraście kratna. 

Zaviaršajučy ahlad svaich učorašnich uražańniaŭ, chaču nabracca nachabnaści i paraić čytačam «Našaj Nivy» nie čytać pierad abiedam levych zachodnich haziet. 

Tak Amieryku nikoli nie zrazumieć. A zrazumieć jaje biełarusam pryjdziecca. Biez taho, kab Amieryka pieramahła ŭ novaj Chałodnaj vajnie, biełarusam viek voli nie vidać». 

• 53
• 5
• 7
• 37
• 2
• 1
• 0
• 0