Малодшым школьнікам прапануюць «злавіць монстра, які спрабуе сарваць выбары»
16.01.2025 / 19:2
Выданне «Падарожжа ў краіну выбараў» выпусціў Беларускі прафсаюз работнікаў адукацыі і навукі пры падтрымцы ЦВК. 16 студзеня адбылася ягоная прэзентацыя ў мінскай гімназіі № 33, піша «Позірк» на падставе паведамленняў дзяржаўных СМІ.
Фота: sb.by
На прэзентацыі адзначалася, што
«галоўныя героі — Даша і Паша — прапануюць дзецям выканаць заданні: напрыклад, правесці выбары ў сваёй сям'і, дзе кожны прагаласуе за начынне ў дранікі, палічыць бюлетэні, злавіць монстра, які спрабуе сарваць выбары прэзідэнта».
«Выбары прэзідэнта — складаны грамадска-палітычны працэс, і мы задумаліся: як у даступнай форме расказаць дзецям пра яго, каб яны з дзяцінства разумелі, як пабудаваная нашая дзяржава», — заявіла старшыня Моладзевай рады прафсаюза Дар'я Паўлоўская.
Брашура выдадзеная накладам 5 тысяч асобнікаў.